Buenos Airesko Gobernuaren ordezkaritza bat EAEn dago bertako enplegu eta inklusio politika publikoak ezagutzeko

GASTEIZ 25 (EUROPA PRESS)

Buenos Aires probintziako Gobernuko Lan Ministerioaren ordezkaritza batek Eusko Jaurlaritzako Ekonomia, Lan eta Enplegu Saila eta Lanbide Euskal Enplegu Zerbitzu Publikoa bisitatu ditu ostiral honetan, Jorge Walter Correa ministroa buru zela, Euskal Autonomia Erkidegoak (EAE) enpleguaren, inklusioaren, gizarte babesaren eta gizarte ekonomiaren arloetan garatzen dituen politika publiko nagusiak ezagutzeko.

Bisitari esker, esku hartze publikoko esperientziak eta ereduak partekatu ahal izan dira, baita EAEren eta Buenos Aires probintziaren artean interes komuneko balizko esparruak aztertu ere, Eusko Jaurlaritzao iturriek jakinarazi dutenez.

Agenda 10:30ean hasi da, Lanbideren Gasteizko instalazio nagusietara egindako bisitarekin. Francisco Pedraza Moreno zuzendari nagusiak eta Jose Antonio Garcia Diaz Koordinazio eta Komunikazio zuzendariak egin diote harrera Argentinako ordezkaritzari.

Ondoren, 12:00etan, Mikel Torres bigarren lehendakariorde eta Ekonomia, Lan eta Enplegu sailburuak lan bilera egin du Jorge Walter Correa ministroarekin, Eusko Jaurlaritzak Lakuan duen egoitzan. Sara Buesa Rodriguez Enplegu eta Inklusio sailburuordeak, Jokin Diaz Arsuaga Gizarte Ekonomiako zuzendariak eta Miriam Rosana Signo Buenos Airesko ordezkaritzako laguntzaileak ere hartu dute parte bileran.

Bertan, Ekonomia, Lan eta Enplegu Saileko ordezkariek bultzatzen dituzten politiken oinarrizko ildoak azaldu dituzte, arreta berezia jarriz enplegagarritasuna hobetzeari, gizarteratzeari eta laneratzeari, pertsonei laguntza pertsonalizatua emateari, prestakuntzari, kontratazioari laguntzeari eta gizarte ekonomia indartzeari.

Era berean, enplegu zerbitzu publikoen egungo erronkei eta politika publikoak ekonomiaren, gizartearen eta lanaren eraldaketetara egokitzeko beharrari buruzko esperientziak trukatzeko balio izan du topaketak.

Lanbidera egindako bisitak aukera eman dio Argentinako ordezkaritzari haren gobernantza eredua, antolaketa egitura, zerbitzu zorroa eta etorkizuneko erronka nagusiak ezagutzeko. 'Lanbide Hobetzen' berrikuntza eta eraldaketa prozesua ere ezagutu du ordezkaritza argentinarrak, pertsonak eta enpresak ardatz izango dituen zerbitzu eredu bat eratzera bideratua, antolaketa egitura berri batekin batera.