'Cinco lobitos', 'Irati' edota 'La consagración de la primavera', Gasteizko 39. Euskal Zinemaren Astean

GASTEIZ, 13 (EUROPA PRESS)

Vital Fundazioak Gasteizen antolatzen duen Euskal Zinemaren Asteak 39. aldia egingo du otsailaren 20tik 25era, eta sei film luze eta bost labur ikusteko aukera izango da, besteak beste, 'Cinco lobitos', 'Irati' edota 'La consagración de la primavera'. Emanaldi bakoitzaren ondoren solasaldia izango da protagonistekin.

Emanaldiak 19:30ean hasiko dira Vital Fundazioa Kulturunean, eta abonamenduak (15 euro) eta sarrerak (4 euro) astelehen honetatik daude salgai www.fundacionvital.eus webgunean eta Vital Fundazioaren egoitzan (Aiztogile kalea 24, Kordoi Etxea).

Euskal Zinemaren Astearen 39. edizioa astelehen honetan aurkeztu dute Txus Ruano antolakuntza arduradunak (Vital Fundazioa) eta Kepa Sojo jaialdiaren koordinatzaileak. Sonia Estevez eta Alberto Gastesi zinema zuzendariak ere han izan dira.

Vital Fundazioak euskal zinemaren profesionalek aurreko urtean egindako edo ekoitzitako lan onenak biltzen ditu urtero. Edizio honetan Alauda Ruiz de Azua zuzendari bizkaitarraren 'Cinco lobitos' nabarmentzen da, Goya sarietarako 11 izendapen izan ondoren, hiru irabazi baititu: Zuzendari Berri Onena, Emakumezko Aktore Protagonista Onena eta Bigarren Mailako Emakumezko Aktore Onena'.

Ruiz de Azuarekin filmarekin batera, Fernando Francoren 'La consagración de la primavera' ere izango da ikusgai, Telmo Iruretari Gizonezko Aktore Berri Onenaren Goya saria ekarri dion filma, hain zuzen. Gainera, Paul Urkijo zinemagile arabarraren 'Irati' film berria ere ikusi ahalko da Euskal Zinemaren Astean.

"Vital Fundazioaren Euskal Zinemaren Astean mantendu dugun ezaugarri bat jaialdi parte hartzailea izatea da. Izan ere, publikoak epaimahai lana ere egiten baitu, eta emanaldi bakoitzaren ondoren bere botoa ematen du lan onenak aukeratzeko", azpimarratu du Txus Ruanok.

Emaitzak amaierako galan jakinaraziko dira. Bertan, film luze onenaren eta film labur onenaren sariak emango dira, eta Gutako Bat saria emango zaio Arabako zinemako profesional garrantzitsu bati.

"Aurtengo 39. edizio honen eskutik, euskal talentu zinematografikoarekin dugun konpromisoa indartzen jarraitu nahi dugu, eta horren erakusgarri da aurten emango diren bost film laburrek Vital Fundazioaren laguntza izan dutela ekoizteko", Ruanok gaineratu duenez.

EGITARAUA

39. Euskal Zinemaren Astearen egitaraua otsailaren 20an hasiko da, Imanol Ortizen 'N-666' beldurrezko film laburrarekin eta Mikel Gurearen 'Suro' film luzearekin. Biharamunean, otsailaren 21ean, Kevin Iglesias eta Pedro Riveroren 'Los días que (nunca) fueron' eta 'La consagración de la primavera' lanen txanda izango da.

Hilaren 22an, aldiz, 'Cinco lobitos' saritua proiektatuko dute, Sonia Estevezen 'Txotxongiloa' film laburraren ondoren. Otsailaren 23ko emanaldia Sergio Azkarateren 'Erroak' film laburrak hasiko du, eta jarraian Alberto Gastesiren 'Gelditasuna ekaitzean' emango dute.

Beatriz Silvaren 'Tula' film laburra eta Jabi Elortegiren 'El vasco' film luzea izango dira ikusgai otsailaren 24an, eta 2023ko Euskal Zinemaren Astea bukatzeko, itxiera eta sari banaketa ekitaldian, Paul Urkijoren 'Irati' proiektatuko da.