EAEko landetxeetako sarrerak %21,6 eta ostatu gauak %16,1 gehitu dira martxoan

BILBO 23 (EUROPA PRESS)

Euskal Autonomia Erkidegoko (EAE) landetxeetan martxoan izandako sarrerak %21,6 eta ostatu gauak %16,1 gehitu dira aurreko urteko hil beraren aldean, 10.852 sarrera eta 23.038 ostatu gau erregistartu ondoren. Sarreren %83,1 eta ostatu gauen %80,1 Espainiako Estatutik etorritako bisitarienak izan dira, Eustat euskal estatistika erakundearen datuen arabera.

Lurralde historikoka, Araban 2.033 sarrera erregistratu dira, aurreko urteko martxoan baino %53,4 gehiago; Bizkaian, %30,2 igo ondoren, 2.455 sarrera erregistratu dira, eta Gipuzkoan 6.364 sarrera izan dira, iaz baino % 11,3 gehiago. Ostatu gauei erreparatuta, Araban %32,1 igoera izan da eta 4.248 ostatu gau erregistratu dira; Bizkaian 5.355 ostatu gau izan dira, 2025eko martxoan baino %39,2 gehiago, eta Gipuzkoan %5,1 gehitu dira, 13.435 erregistratu ondoren.

Batez besteko egonaldia 2,12 egunekoa izan da martxoan EAEko landetxeetan, 2025eko hilabete berean erregistratutako 2,22 eguneko batez bestekoaren azpitik. Plazen eta logelen araberako okupazio mailek %2,3 eta %1,9 puntu egin dute gora urte artean, hurrenez hurren; plazen arabera neurtuta okupazioa %19,3 izan da, eta logelen arabera neurtuta %22,7.

Bestalde, EAEko apartamentu turistikoek 17.214 sarrera eta 65.079 ostatu gau izan dituzte martxoan, aurreko urteko martxoan baino %12,7 eta %20,8 gehiago, hurrenez hurren. Sarreren %31,9 eta ostatu gauen %35,2 atzerriko jatorriko bisitarienak izan dira.

Batez besteko egonaldia 3,78 egunekoa izan da martxoan EAEko apartamentu turistikoetan, 2025eko hilabete bereko 3,53 eguneko batez bestekoa baino luzeagoa. Lurralde historikoen arabera aztertuta, batez besteko egonaldia 2,57 egunekoa izan da Bizkaian, 5,49 egunekoa Gipuzkoan eta 15,77 egunekoa Araban.

Plazen araberako okupazio maila %34,8koa izan da erkidego mailan, eta %66,4ra iritsi da apartamentuen arabera neurtuta. Horrek esan nahi du urte artekoan %3,5 eta %7,2 puntuko igoerak izan direla, hurrenez hurren.

Turismo aterpetxeei dagokienez, 15.583 sarrera eta 28.856 ostatu gau izan dira martxoan EAEn, iazko martxoan baino %0,2 eta %0,8 gutxiago, hurrenez hurren. Plazen araberako okupazio maila %27,8koa izan da, eta batez besteko egonaldia 1,85 egunekoa.

LEHEN HIRUHILEKOA

Urteko lehen hiruhilekoan metatutako datuen dagokienez, EAEko landetxeek 20.309 sarrera eta 45.006 ostatu gau erregistratu dituzte, 2025eko aldi berean baino %3,0 eta %4,1 gehiago, hurrenez hurren. Batez besteko egonaldia 2,22 egunekoa izan da, aurreko urtekoa baino luzeagoa, 2,19 egunekoa izan baitzen.

Okupazio mailari erreparatuta, eta plazen arabera neurtuta, %14,5era iritsi da, 2025eko aldi metatu berean %14,0koa izan zenean. Logelen arabera neurtuta, 2025eko aldi metatu berekoa baino zertxobait txikiagoa izan da, kasu horretan %17,8koa izan baitzen eta 2026ko hiru hilabeteotan %17,5ekoa izan baita.

Apartamentu turistikoei erreparatuta, martxora arte metatutako aldian 41.734 sarrera eta 162.724 ostatu gau izan dira, 2025eko aldi beran baino %4,2 eta %11,5 gehiago, hurrenez hurren. 2026ko lehen hiru hilabeteetan batez besteko egonaldia 3,90 egunekoa izan da, eta 2025eko aldi berean, berriz, 3,64 egunekoa izan zen.

Plazen araberako okupazio maila %31,8koa izan da, 2025eko aldi berekoa baino %0,9 puntu handiagoa. Apartamentuen okupazio maila %61,8koa izan da, hau da, 2025eko aldi berekoa baino %3,1 puntu handiagoa.

Azkenik, aterpetxe turistikoei dagokienez, 33.618 sarrera eta 64.449 ostatu gau izan dira urtarriletik martxora, 2025eko aldi berean baino %0,9 gutxiago eta %5,0 gehiago, hurrenez hurren. Batez besteko egonaldia 1,92 egunekoa izan da, iazko 1,81 eguneko egonaldia baino handiagoa. Plazen araberako okupazio maila %24,2koa izan da, 2025eko aldi berean erregistratutakoa baino %0,7 puntu handiagoa.