Ertzain bati droga trafikoagatik ezarritako sei urte eta erdiko espetxe zigorra berretsi dute

BILBO 19 (EUROPA PRESS)

Euskal Autonomia Erkidegoko (EAE) Auzitegi Nagusiko Arlo Zibileko eta Zigor Arloko Salak berretsi egin ditu Bizkaiko Probintzia Auzitegiak ertzain bati droga trafikoagatik eta sekretuak ezagutarazi eta agerrarazteagatik ezarritako sei urte eta erdiko espetxe zigorra eta 2.160 euroko isuna.

EAEko Auzitegi Nagusiak jakinartazi duenez, modu honetan, ezetsi egin du akusatuak eta beste pertsona batek jarritako errekurtsoa. Pertsona hori ere prozedura berean zigortu zuen Bizkaiko Auzitegiak eta zazpi urte eta erdiko espetxe zigorra ezarri zion droga trafikoagatik.

Bizkaiko Auzitegiak erabaki zuen "zuzeneko nahiz zeharkako froga ugari" zegoela, eta ondorioztatu biak drogen legez kanpoko trafikoan zebiltzala, bai eta "biek ala biek" ertzainaren etxebizitzaren erregistroan aurkitutako 54 kilo kokaina baliatzeko asmoa zutela "hirugarrenei banatu eta saltzeko" Bizkaiko hainbat udalerritan eta probintzia mugakideetan.

Bi zigortuek errekurtsoa aurkeztu zuten EAEko Auzitegi Nagusian, eta, besteak beste, alegatu zuten kondenatuak izan zirela auzitegiek legez kanpokotzat jotako entzute baten ondoriozko ikerketa bat oinarri hartuta.

EAEko Auzitegi Nagusiak gogorarazi du entzute hori alde batera utzita, gainerako frogek "baliozkotzat jotzeko baldintzak" bete dituztela, bi gizonak ikertuak izateko eta agentearen etxean sartzeko arrazoiak "justifikatuta" daudelako eta "agindu judizial legitimoetan" oinarritzen direlako.

Auzitegi Nagusiak bere ebazpenean gaineratu duenez, Ertzaintzaren Barne Arazoetarako Unitateak "droga trafikoan kolaboratzaile izatearen susmagarri" gisa identifikatu zuen ertzaina, eta Guardia Zibilak "haren aurkako 'zantzuak' lortu zituen telefono entzunaldi zilegien bitartez, gerora Ertzaintzari jakinarazi zizkionak".

Era berean, esan du ez zela agentearen aurkako ikerketa prospektiborik egin, baizik eta "hasteko arrazoi sendoak" zeudela, eta, kargu froga egon eta zilegitasuna berretsi zenez, ezin dela pentsatu Bizkaiko Auzitegiaren epaiak errugabetasun presuntziorako eskubidea urratu dionik.

EAEko Auzitegi Nagusiak azaldu duenez, ertzainari egindako jarraipenak eta entzuketak justifikatzen dituen iturri independente bat dagoela egiaztatu ondoren, beste zigortua ikerketan "sartu" zen modua ere "zilegi da, egindako ikerketatik eratorritakoa baita".

Espetxe zigorrez gain, Bizkaiko Auzitegiak hiru milioi euroko isuna ezarri zien kondenatuei, besteak beste. EAEko Auzitegi Nagusiak berretsi egin ditu neurri horiek guztiak, irmoa ez den eta Auzitegi Gorenean errekurritu daitekeen ebazpen batean.