GASTEIZ, 27 Sep. (EUROPA PRESS) -
Gasteizko Udalak 'Gasteiz, hiri hezitzailea' programaren 2020-2021eko ekitaldiko jarduerak aurkeztu ditu asteazken honetan. Hainbat arlotako 212 jarduera izango dira, eta urriaren 8tik aurrera eman ahalko da izena www.vitoria-gasteiz.org webgunean, udaleko iturriek jakinarazi dutenez.
Zehazki, ingurumena (13 jarduera), hiriaren ezagutza (21), euskararen erabileraren sustapena (9), arte eta ikus-entzunezkoen hezkuntza (51), gorputz hezkuntza eta kirola (9) eta berdintasunerako hezkuntza (3) gaiak jorratuko dira. Era berean, osasunerako hezkuntza (34), herritarren parte hartzearen sustapen (13), gaitasun pertsonalaren heziketa (34), bizikidetza eta aniztasun (13), garapenerako lankidetza eta nazioarteko elkartasun (3) eta babes eta segurtasuneko (9) lantegiak eskainiko dira.
Programaren eskaintzan 19 berritasun, horietako batzuk covid-19aren pandemiak eragindako osasun krisiari lotuak, esaterako 'Erlaxatzen ikasi. Antsietateari aurre egin' edo 'Emozioen kudeaketa koronabirus garaietan'.
Jarduera programa hau Gasteizko Udaleko Hezkuntza Zerbitzuak azken 30 urteetan gauzatutako estrategiaren parte da. Estrategia horri esker, Hiri Hezitzaileen Estatuko Sareko koordinatzaile izatea lortu du. Halaber, Gasteizek 'Hiri inklusiboa, hiri hezitzailea' izeneko sare tematikoa ere koordinatzen du estatu mailan.
Aurten, arreta eta babes behar handiagoa duten ikastetxeei erraztasunak emango zaizkie programan parte hartzeko. "Izena emateko epe orokorra urriaren 8an hasiko bada ere, ikastetxe horiek urriaren 5etik aurrera izena emateko aukera izatea aurreikusi dugu. Ezin dugu ahaztu gizarte kohesioa hobetzeko erronka dugula, desberdintasunetan eraginez eta hiriko ikastetxeen arteko aukera berdintasuna handiagoa izateko", azpimarratu dute.
