Gehibat Kultura Elkarteko Xabin Fernandezek jasoko du Lautan Hiru laguntza, 'Zaku berekoak' antzezlanagatik

BILBO 7 (EUROPA PRESS)

Xabin Fernandez Gehibat Kultura Elkarteko kideak jasoko du Euskaltzaindiaren 2025eko Lautan Hiru laguntza, 'Zaku berekoak' antzezlanagatik. Sortzaile gipuzkoarrak 2.500 euroko zenbatekoa eskuratuko du eta lana 2026ko otsailean antolatuko den VIII. Lautan Hiru jaialdian estreinatuko da, Euskararen Akademiatik jakinarazi dutenez.

Euskaltzaindiak antzerki ekoizpena sustatzeko Lautan Hiru laguntza sortu zuen 2020an, Bilboko Udalaren babesarekin. Sariaren helburu nagusia euskarazko antzerkia sustatzea da, batez ere, lan laburren sorkuntzari bultzada emateko xedez.

Horretara, aurtengo Lautan Hiru laguntza Gehibat Kultura Elkarteak irabazi du, 'Zaku berekoak' lan laburrari esker. Xabier Fernandezen proiektua da, eta gidoia ere berak idatzi du. Dena den, Intujai konpainiarekin elkarlanean bideratuko dute proiektua, eta antzezlana 2026ko otsailean antolatuko den VIII. Lautan Hiru jaialdian estreinatuko da.

Epaimahaiko kideen arabera (Tartean, BIRA Kultura, 7Katu eta Euskaltzaindia), "testuan ausardia erakutsi du egileak, eta txotxongiloak baliatuz indar handia har dezake lan ilun honek".

Sinopsiari dagokionez, 'Zaku berekoak' lanean, gizon batek bere familiarekin ospatu nahi du urtebetetzea, baina, zer gertatzen da inork erantzuten ez dionean? 'Zaku berekoak' oroimenaren eta eromenaren artean igerian dabilen arima baten istorioa da. Odolekoa ez duen bere familia, panpin erraldoien irudian jasoko du ikusleak, bizitza bat antzeztu nahi duen gizon baten delirio poetiko moduan. Bakarrizketa dramatiko honetan, antzerkia eta txotxongilo teatroa uztartzen dira, gizakiaren barneko haustura erakusteko.