Gipuzkoako Moeve gasolindegiko 150 langileek greba egingo dute abuztuaren 14tik 16ra

DONOSTIA 5 (EUROPA PRESS)

Abuztuaren 14ko 22:00etatik abuztuaren 16ko 22:00etara egingo dute greba Moevek Gipuzkoan dituen 16 gasolindegietako 150 langileek. Enpresa batzordea LABeko 5 ordezkarik eta ELAko 3k osatzen dute.

LABek eta ELAk jakinarazi dutenez, "langileek hainbat hilabete daramatzate enpresaren barne ituna negoziatzen eta enpresak langileen lan baldintzak duintzeko behar adina aurrerapauso eman ez dituenez, lehenbiziko greba zikloari ekin zioten pasa den uztailaren 30tik abuztuaren 2ra". Greba ziklo horren jarraipena ia erabatekoa izan zen eta, honek indartu egiten ditu langileen aldarrikapenak enpresaren aurrean.

Sindikatuek adierazi dutenez, "abuztuaren 2an izandako langile batzarrean, bi konpromiso hartu genituen enpresa batzordean ordezkaritza dugun sindikatuek. Batetik, enpresa bilera berri batera deitzea, benetako negoziazioa exijitzeko. Bestetik, enpresaren jarrerak berbera izaten jarraitzen baldin bazuen, hots, langileen lan baldintzak duintzeko behar adina aurrerapauso ematen ez bazituen, bigarren greba zikloari ekingo ziotela".

Horrela, enpresarekin harremanetan jarri ziren eta bilera berri bat zehazteko bidean daude. Bestalde, ELAk eta LABek azaldu dutenez, "formalki jakinarazi diogu enpresari abuztuaren 14an langileen bigarren greba zikloari ekingo diotela eta ordura arteko epea duela behar bezalako aurrerapausoak eman eta langileen beharrei erantzuten dien itun bat sinatzeko".