Laneko arrisku psikosozialen inguruan sentsibilizatzeko kanpaina abiatu du Osalanek

BILBO 19 (EUROPA PRESS)

Osalan Laneko Segurtasun eta Osasunaren Euskal Institutuak laneko arrisku psikosozialen inguruan sentsibilizatzeko kanpaina bat jarri du martxan, 'Zenbait arrisku ikusgai daude, eta ikusgai ez daudenak, ordea?' izenburupean. Ekimena arrisku psikosozialen identifikazioan eta prebentzioan oinarrituko da.

Lourdes Iscar Osalaneko zuzendari nagusiak aurkeztu du ekimena astelehen honetan Bilbon, Laneko Segurtasun eta Osasunerako Europako Astea dela eta. Azpimarratu du laneko arriskuen prebentzioak aurrerapen handiak lortu dituela azken hamarkadotan, arrisku fisiko agerikoenak identifikatu eta kontrolatu direlako.

Hala ere, adierazi du lan munduaren bilakaerak behartu egiten duela "hain agerikoak ez diren baina langileen osasunean, ongizatean eta bizi kalitatean zuzeneko eragina duten beste faktore batzuei gero eta arreta handiagoa ematera". "Lanaren antolamenduak, lan kargak, komunikazioak, autonomiak edo lan harremanek eragin erabakigarria izan dezakete langilen ongizatean", azaldu du.

Osalaneko zuzendari nagusiaren arabera, prebentzio eraginkorrak arrisku horiek sorrarazten dituzten kausetan eragin behar du, eta ez ondorioetan bakarrik. Horregatik, lana nola antolatzen den, zereginak nola planifikatzen diren eta erakundeetan parte hartzeko eta laguntzeko zer mekanismo dauden aztertu behar dela defendatu du.

Kanpainak beti "begi hutsez" ikusten ez diren arriskuen berri eman nahi du, eta gogorarazi prebentzioak lan osasunean eragina izan dezaketen faktore guztiak hartu behar dituela kontuan. 'Zenbait arrisku ikusgai daude, eta ikusgai ez daudenak, ordea?' mezu nagusiaren azpian, kanpainak funtsezko bigarren ideia dauka osagarri: 'Prebentzioak arrisku guztiak, ikusgai ez daudenak ere, antzematea, ebaluatzea eta kudeatzea du helburu'

PREBENCLICK

Berritasun gisa, Osalanek PrebenClick ere aurkeztu du, herritar guztientzako tresna interaktiboa. Arrisku psikosozialekin lotutako galderetan eta egoeretan oinarritutako jokoaren bidez, aplikazioak aukera emango du lan ingurunean dauden errealitateei buruz hausnartzeko eta maiz oharkabean igarotzen diren arrisku faktoreak identifikatzen ikasteko.

Kanpaina honen bidez, Osalanek gogoeta kolektiboa bultzatu nahi du, arrisku psikosozialak prebentzioaren kudeaketan txertatzea erabat garrantzitsua dela adierazteko eta pertsonen osasuna eta ongizatea erakundeen erdigunean jarriko dituen prebentzioaren kulturarantz aurrera egiteko.

Osalaneko zuzendari nagusiak adierazi duenez, "arriskuak identifikatzea da arriskuak prebenitzeko eta lan ingurune seguruagoak, osasungarriagoak eta iraunkorragoak eraikitzeko lehen urratsa".