Mundu osoko unibertsitateetako euskara eta euskal kulturako irakasleak bilduko dira ostiralean Donostian

DONOSTIA, 10 (EUROPA PRESS)

Etxepare Euskal Institutuaren Irakurleen VIII. Topaketa egingo da Donostiako Tabakaleran ostiralean, uztailaren 11n, eta munduko hainbat unibertsitatetan euskara eta euskal kultura irakasten duten irakasle edo irakurleak bilduko dira.

Hain zuzen, hamar herrialdetatik heldutako 13 irakaslek hartuko dute parte, proiektuak partekatzea, ikasturtearen balorazioa egitea eta nazioarteko testuinguruetan euskara irakasteak dakartzan erronkez hausnartzea xede, Etxepare Euskal Institututik jakinarazi dutenez.

Irakurleok lanean aritu dira ikasturtean zehar Edinburgo, Berlin, Santa Barbara, Helsinki, Paris, Habana, La Plata, Chicago, Brno, Praga, Bolonia, Venezia edota Varsovia moduko hirietako unibertsitateetan, eta Etxepare Euskal Institutuak sustatzen duen unibertsitate sareko kide dira. Sareak 35 unibertsitate biltzen ditu mundu osoan egun, eta guztira 29 irakurlek dihardute euskara eta euskal kultura irakasten.

Eztabaida saioez eta esperientzien trukerako tarteez gain, ostiraleko topaketak bideo sorkuntzari buruzko prestakuntza praktikoa eskainiko du, Beñat Flores adituaren eskutik. Helburua da irakurleek euskararen irakaskuntza eta zabalkunderako baliabide berritzaileak eskuratzea.

Halaber, topaketan parte hartuko dute Etxepare Euskal Institutuko zuzendari Irene Larrazak, Euskara Sustatu eta Hedatzeko zuzendari Monika Madinabeitiak eta irakurletza sarearen arduradunak diren Eneko Agirre eta Amaia Goikoetxea teknikariek.

Etxepare Euskal Institutuaren Irakurleen VIII. Topaketak amaiera emango dio unibertsitate sarea sendotu eta irakasleen gaitasunak eguneratzea helburu dituen hiru eguneko prestakuntza programari.

Programaren baitan, irakurleek Euskal Herriko Unibertsitatearen (EHU) Udako Ikastaroen testuinguruan antolatutako Bikaintasuna Euskal Ikasketetan XV. ikastaroan hartu zuten parte asteazkenean, eta ostegun honetan baliabide digitalen erabilerari buruzko saio praktiko batean arituko dira, batez ere jokoetan oinarrituta, gelako jardueretarako baliagarriak izan daitezkeen ariketak identifikatu eta lantzeko asmoz.

PRESTIGIOA EMAN

Etxepare Euskal Institutuak euskara eta euskal kulturaren irakaskuntza sustatzen du nazioarteko unibertsitateetan, euskal ikasketei zabalkundea, sakontasuna eta prestigioa emateko xedez.

Erreferentziazko unibertsitateekin sinatutako lankidetza hitzarmenen bidez, Etxepare Institutuak euskararen eta euskal kulturaren nazioarteko proiekzioa indartzen eta unibertsitate testuinguru globalean beste hizkuntza eta komunitateekin topaguneak sortzen laguntzen du.

Irakaskuntzaz harago, irakurleak euren unibertsitateetako bizitza kulturalaren dinamizatzaile dira, jarduera akademiko eta kulturalak antolatuz eta kulturen arteko elkarrizketa sustatuz.

2018tik egiten den irakurleen topaketaren helburua da sare estrategiko hori sendotzea, praktika onak trukatzea eta euskararen eta euskal kulturaren ordezkari diren irakurleen prestakuntza profesionala indartzea.