Suediako ordezkaritza bat Bilboko etxebizitza publikoaren eredua ezagutzen ari da bertatik bertara

BILBO, 8 (EUROPA PRESS)

Suediako Varbergs hiriko etxebizitza arloko udal enpresako arduradunek Bilbo bisitatu dute hirian etxebizitza publikoa kudeatzeko erabiltzen den eredua ezagutzeko, Bilboko Udaletik jakinarazi dutenez.

Hain zuzen, Yolanda Diez Etxebizitzako zinegotziak eta Udal Etxebizitzak erakundeko arduradunek hirian etxebizitza publikoa kudeatzeko eredua erakutsi diote Suediako ordezkaritzari, eta bi hirietako esperientziei buruzko iritziak trukatu dituzte asteartean hasi eta asteazken honetan amaituko den bisitan.

Diezek berak azaldu duenez, "esperientzien eta ezagutzen trukaketa horiek balio handia dute etxebizitza sozialaren arloan kalitate goreneko zerbitzu bat eskaintzeko dugun asmoan aurrera egiteko eta hobetzeko".

Bilbon 4.226 udal etxebizitza daude egun, eta etxebizitzotan 8.719 pertsona bizi dira, haietako %46 35 urtetik beherakoak izanik. Ildo horretan, Suediako ordezkaritzak Ametzolako zuzkidura bizitokiak ezagutu ahal izan ditu, dagoeneko martxan dagoen fasea zein bigarren faseko eraikuntza obrak bertatik bertara ezagutuz.

Era berean, Otxarkoagako udal etxebizitzak bisitatu dituzte. Bertan, eraikinak birgaitzeko lan handia egiten ari dira, energia eraginkortasuneko eta irisgarritasun unibertsaleko irizpideekin.

Bilboko Udal Etxebizitzak eta Varbergs Bostad Eurhonet sareko kideak dira, eta sarea osatzen duten erakundeen arteko lankidetzan dago topaketa. Eurhonet sareak etxebizitza publiko eta soziala hornitzen duten Europako 36 entitate biltzen ditu, alokairu merkeak ordaintzen dituzten 1,8 milioi pertsona barnean hartzen dituztenak.