Zetak taldearen 'Xiberutikan Mendebaldera' da 24. Korrikaren abestia

BILBO 11 (EUROPA PRESS)

Zetak taldearen 'Xiberutikan Mendebaldera' abestiak jarriko dio doinua 2026ko martxoaren 19tik 29ra ospatuko den 24. Korrikari, Agoizko (Nafarroa) Kultur Etxean ostegun honetan egindako agerraldian iragarri dutenez. Ane Elordi Korrika arduradunak, Pello Reparaz kantaren egileak eta Maixux Zugarramurdi abeslariak aurkeztu dituzte 24. Korrikaren kanta eta bideoklipa.

Ageraldian azaldu dutenez, Pello Reparazek sortu ditu kantaren musika zein letrak, eta bideokliparen zuzendaritza lanaz ere arduratu da. Reparazekin batera, Maixux Zugarramurdi eta Erramun Martikorena abeslariek hartu dute parte. Bideoklipari dagokionez, nabarmentzekoa da plano sekuentzian grabatuta dagoela.

Ane Elordik gidatu du ekitaldia, eta zinez eskertu du Reparazen ahalegina: "Eskerrik asko Korrikarako kanta zoragarri hau ekoizteagatik eta, are gehiago, musikatik euskarari eta euskal kulturari egiten diezun ekarpenagatik".

Elordik azaldu duenez, aurten, lehenengo aldiz, AEK osoak prozesu demokratiko baten bitartez aukeratu du nori egin kantaren enkargua. "Aurrenekoz, AEKide guztion artean erabaki dugu noren eskutan jarri Korrikaren kanta", esan du.

Ondoren, Reparazek hartu du hitza eta Korrikaren abestia sinatzea bere ibilbide artistikoko "erantzukizun eta poz handienetako bat dela" aitortu du. "Ez da enkargu hutsa: kantaren bidez euskarak eta Korrikak niri eman didatenaren zati bat itzultzea da", ziurtatu du.

Reparazek 24. Korrikaren leloaren "pisu handiaz" hitz egin du. "Ez gara bakarrik hizkuntzaz ari, bizitzeko, elkar zaintzeko eta etorkizun duinago bat elkarrekin irudikatzeko modu bati buruz ari gara", adierazi du.

Azaldu du kantari mugimenduan dagoen komunitate baten sonoritatea ematen ahalegindu dela, "ez ereserki zurrun" batena. Entzuten duenak koru honen parte sentitu dezan nahi izan duela aipatu du, eta abestiak jendarteari euskarara hurbiltzeko gonbita egiten diola.

"AEKren euskaltegietan izena ematera lehen urratsa emateko, alabarekin duen elkarrizketa batean euskaraz egitera animatzeko, edota Korrikan kilometro bat gehiago egitera sustatzeko balio badu, kantak bere funtsa beteko du", nabarmendu du.