SANTIAGO DE COMPOSTELA, 28 (EUROPA PRESS)

O conselleiro de Innovación e Industria, Fernando Blanco, garantiu hoxe que Galicia disporá "da mellor infraestrutura de banda ancha" de España, "a pesar das dificultades orográficas que a encarecen", e subliñou que o crecemento nesta materia desde 2005 "é claramente espectacular".

Na súa comparecencia en comisión para presentar os orzamentos do seu departamento para 2009 Blanco replicou así ao deputado do PP Anxo Bernardo Tahoces, quen recordou que os últimos datos pechados en I D -do ano 2006- presentan peores incrementos porcentuais en Galicia que na media do Estado.

Fernando Blanco recordou que a consellería disporá en 2009 de 167,4 millóns de euros para I D i e Sociedade da Información e, "a maiores", un préstamo de 99 millóns de euros do Goberno central, dos que 91 empregaranse para implantar a banda ancha na comunidade.

"Serán uns recursos importantísimos para dar un salto cualitativo en 2009, pois ningún territorio do Estado terá unha infraestrutura por cable tan importante, que é a infraestrutura do futuro", subliñou o titular de Innovación. Respecto diso, Tahoces recordoulle que "é un préstamo, que haberá que devolver, e que as competencias de telecomunicacións tenas o Estado".

O nacionalista Fernando Blanco Parga coincidiu co conselleiro en que "non hai cor" entre as contas presentadas e as últimas elaboradas polo PP en 2005, mentres que o socialista Manuel Gallego Lomba cualificou 2009 como "o ano da banda ancha" e esta lexislatura como "a do I D i".

Na súa defensa dos orzamentos para o próximo exercicio, que sumarán 383 millóns de euros, un 3,7 por cento máis que este ano, Fernando Branco explicou que os dous trazos principais que os definen é que "inciden" nas políticas marcadas ao comezo da súa xestión por entender que están cumprindo os obxectivos e adáptanse" á situación de crise co fin de contribuír a que Galicia "salga reforzada" desta conxuntura económica.

Con todo, para Ángel Bernardo Tahoces, as contas elaboradas son "electoralistas", pois potencian os convenios con institucións e entidades sen fins de lucro, "xeneralistas", porque non se identifican recursos, "nin sectoriais, nin territoriais"; e "pouco austeras", xa que "hai partidas millonarias facilmente prescindibles".

MÁIS GASTO CORRENTE QUE DE CAPITAL

Así, denunciou que os gastos correntes soben un 9,3 por cento, mentres o de capital fano un 1,7 por cento, ao que o conselleiro precisou que os gastos en bens e servizos baixan un 7 por cento, pero si soben os xenerais debido á retribución dos funcionarios e á mellora dos investigadores, pois se prevé sufragar os 500 contratos postos en marcha este ano, con garantías de salario digno e permanencia no sistema.

O conselleiro tamén apelou á colaboración "entre o público e o privado" neste momento de dificultades económicas e, ante as críticas de Tahoces de que non figuran partidas específicas para automoción, aeronáutica ou madeira, indicou que se atenderán en función das necesidades e as distintas características de cada actividade e en cada momento.

Blanco puntualizou que os orzamentos para 2009 aséntanse en catro alicerces fundamentais: a innovación e o coñecemento; a eficiencia e o desenvolvemento sostible; a excelencia e o mercado global; e o desenvolvemento equilibrado social e territorialmente.

Así, para eficiencia e desenvolvemento sostible, cifrou en 45,7 millóns os recursos destinados ao aproveitamento integral da enerxía, un 2,3 por cento máis que en 2008; mentres que para a excelencia e o mercado global informou de que se reservan 28 millóns, dos que 6,7 millóns están previsto para a internacionalización empresarial.

Respecto ao comercio e o turismo, suman partidas por 39 e 78,4 millóns de euros, respectivamente. Ademais, o Xacobeo disporá de 26 millóns co obxectivo de comezar a preparar e promocionar por todo o mundo o Ano Santo 2010.