SANTIAGO DE COMPOSTELA 8 Nov. (EUROPA PRESS) -

O 77,3 por cento dos nenos e nenas de entre 10 e 15 anos utiliza habitualmente Internet en Galicia, porcentaxe inferior á media nacional, que se eleva ao 85,1 por cento, segundo os últimos datos difundidos polo Instituto Nacional de Estatística (INE) sobre equipamento e uso de tecnoloxías da información e comunicación nos fogares.

A enquisa, consultada por Europa Press, reflicte que, nos últimos tres meses nos que se solicitaron datos para a súa realización (dende o 19 de xaneiro ata o 3 de abril de 2009 e dende o 2 de febreiro ata o 15 de maio de 2009, segundo os casos), 95.994 dos 124.184 menores desa franxa de idade contabilizados na comunidade autónoma, eran usuarios de Internet.

Galicia presenta, deste modo, a segunda porcentaxe máis baixa entre as comunidades autónomas de nenos de entre dez e quince anos que son usuarios de Internet, só por enriba de La Rioja, cun 76,6 por cento, e da cidade autónoma de Melilla, cun 75,1 por cento.

O ranking está liderado polas Islas Baleares (84,8%) e por detrás, séguenlle Cataluña (93%), Cantabria (92,2%), Andalucía (80,7%) e Navarra (91,2%).

USUARIOS DE ORDENADOR

En canto aos nenos usuarios de ordenador nos últimos tres meses en que se realizou a enquisa, a porcentaxe en Galicia ascende ao 89,5 por cento, tamén inferior á media (94,5%), o que en cifras absolutas supón 111.144 usuarios.

Neste caso, Galicia ocupa o último posto entre as comunidades autónomas, tan só superando á cidade autónoma de Melilla, que queda no 88 por cento.

Tamén Baleares lidera esta clasificación, cun 98,9 por cento; por enriba de Aragón (97,9%), Navarra (97,2%), País Vasco (97,1%) e Castilla y León (96,9%).