SANTIAGO DE COMPOSTELA, 8 May. (EUROPA PRESS) -

A Consellería de Innovación e Industria destinará máis de 23 millóns de euros a potenciar a innovación nas empresas galegas e ao financiamento das plataformas tecnolóxicas, dentro do programa de axudas para o Fomento da Investigación da Innovación Empresarial que publica hoxe no Diario Oficial de Galicia (DOG).

A convocatoria, cofinanciada con fondos Feder --Fondo Europeo de Desenvolvemento Rexional-- e FCI --Fondos de Compensación Interterritorial--, financia accións e instrumentos destinados a estimular a innovación nas empresas galegas en calquera punto da cadea de valor e en todos os procesos da compañía.

As axudas abranguen sete liñas diferentes de financiamento dirixidas a apoiar o desenvolvemento e de proxectos de innovación empresarial en empresas, así como aos centros tecnolóxicos ou clusters empresariais que lideran a posta en marcha de plataformas tecnolóxicas nos sectores estratéxicos para Galicia.

Como novidade desta convocatoria, o departamento que dirixe Fernando Blanco concederá axudas para investimentos innovadores que incidan na capacidade competitiva das empresas.

A nova liña de axudas potencia a creación dun novo centro produtivo ou a ampliación dun xa existente para desenvolver novos produtos e procesos; a ampliación da produción dun establecemento para atender mercados de produtos novos; e a transformación de carácter innovador no proceso global de produción dun centro xa existente.

A contía mínima subvencionable destes proxectos é de 300.000 euros. Para a determinación do custo, considéranse subvencionables os investimentos en instalacións e maquinaria e na transferencia de tecnoloxía mediante a adquisición de dereitos de patentes, licenzas, 'know-how' ou coñecementos técnicos non patentados.