SANTIAGO DE COMPOSTELA, 30 Abr. (EUROPA PRESS) -

A Consellería de Innovación e Industria incorporou hoxe dous novos servizos telemáticos na súa páxina web que permiten tramitar a través de internet todas as axudas do departamento autonómico e enviar ás 3.000 empresas inscritas no rexistro xeral de contratistas notificacións de Correos.

Con este novo sistema, os galegos poderán cubrir formularios on line para solicitar todas as axudas e subvencións da consellería e permitirá ás empresas incorporar novas prestacións telemáticas como recibir e efectuar notificacións a través da Rede. O servizo completarase, para os que o soliciten, con avisos a móbil sobre o estado e a xestión das tramitacións que se demanden.

Na presentación deste proxecto, o conselleiro de Innovación e Industria, Fernando Blanco, destacou que este sistema telemático permite aos usuarios tramitar documentos relacionados con axudas e notificacións a empresas dende o domicilio ou lugar de traballo, sen ter que desprazarse fisicamente aos edificios públicos.

Fernando Blanco recordou que con esta iniciativa, que contou con 160.000 euros para a súa posta en marcha, o seu departamento continúa co "compromiso" de alcanzar un "servizo público de calidade" ao incorporar novas prestacións a través de internet e ofrecer a oportunidade de xestionar documentos vía telemática ademais dos métodos convencionais.

AFORRO ENERXÉTICO.

Ademais destes "beneficios", o titular de Innovación citou o "aforro enerxético" que supón para a Administración autonómica deixar de imprimir "ata 5.000 notificacións" anualmente. Na súa opinión, este sistema telemático contribuirá a reducir custos.

Así mesmo, Blanco destacou que a tramitación electrónica "axiliza" os procedementos tradicionais, unha vantaxe especialmente valorada pola cantidade de impresos que xestiona este departamento, á vez que facilita o traballo. "Este sistema permite maior eficiencia na Administración galega", subliñou.

FUNCIONAMENTO.

En canto ás axudas virtuais, os interesados terán que identificarse na web antes de acceder ao sistema. Para iso, o usuario indicará unha dirección de correo electrónico ou introducirá o número do seu Documento Nacional de Identidade (DNI). Unha vez dentro do sistema, cubrirase o formulario e escollerase entre entregalo no rexistro físico ou envialo a través da Rede.

Pola súa banda, os responsables das empresas terán a posibilidade de enviar notificacións telemáticas, efectuar a declaración do contratista, obter certificados dixitais con validez legar e mesmo proceder á declaración de exención do Impostos de Actividades Económica (I.A.E.). Ao igual que no caso das subvencións, será necesario darse de alta, solicitando unha conta de correo electrónico única, por exemplo.