BNG e PSdeG tachan de "propaganda" o acto da Xunta para a entrega de 24 vivendas en Santiago

   SANTIAGO DE COMPOSTELA, 29 Sep. (EUROPA PRESS) -

   O BNG e o PSdeG coincidiron este martes ao tachar de "propaganda" o acto convocado para a tarde deste martes polo Goberno galego no que farán entrega das chaves de 24 vivendas de promoción pública.

   Na rolda de prensa posterior á Xunta de Portavoces, a viceportavoz parlamentaria do BNG, Olalla Rodil, sostivo que a situación de emerxencia habitacional é "responsabilidade directa" das decisións políticas nun contexto no que lembrou que as competencias na materia residen nas comunidades, é dicir, no Goberno da Xunta.

   "E se non hai vivenda para as necesidades sociais e hai miles de persoas esperando é polas decisións políticas que tomou o Goberno da Xunta, entre elas, paralizar durante 16 anos a construción de vivenda pública no noso país", afirmou.

   "Nin unha soa vivenda protexida para aluguer social nos anos 2015, 2016, 2017, 2019 e 2021" e "tan soa unha en 2018, 11 en 2020 e 3 en 2022", asegurou para remarcar que "agora alaga de propaganda, pero a vivenda non se constrúe en anuncios".

   Nesta liña, sostivo que "a realidade é que o Goberno de Rueda prometeu 1.800 vivenda en aluguer para este ano e que, a tres meses de que finalice o 2026, a Xunta só fixo 98 pisos en Lamas de Abade (Santiago) e Valdecorvos (Pontevedra)".

   Pola súa banda, a viceportavoz parlamentaria do PSdeG, Lara Méndez, criticou que o presidente da Xunta, Alfonso Rueda, vaia hoxe a "sacar peito" coa entrega de 24 vivendas, as "primeiras en 19 anos" de goberno do PP. "Unhas vivendas que veñen da época de Touriño e que están financiadas con fondos do Estado", sostivo.

   Todo iso, sostivo, mentres en Galicia hai "36.500 persoas inscritas no rexistro de demandantes, dos que o 85% solicitan un aluguer". Ademais, asegurou que nos anos 2023 e 2024 foron 868 as persoas que quedaron sen bono aluguer e que en máis de 78.000 fogares galegos o custo da vivenda deixa á familia por baixo do limiar da pobreza severa.

O PPDEG PON EN VALOR A XESTIÓN DA XUNTA

   Pola súa banda, o portavoz parlamentario do PPdeG, Alberto Pazos, respondeu ás críticas da oposición, á que convidou a acudir ao acto da tarde deste martes e preguntar ás familias que van recibir esas vivendas pola súa opinión, "se cren que estamos ante propaganda ou ante a entrega real de fogares".

   Pazos sostivo que "construír relatos é moi sinxelo" pero deixou claro que "construír vivendas leva un pouco máis", pero "o segundo dá infinitamente mellores resultados que o primeiro".

   O dirixente popular destacou que el mesmo acudirá ao acto para observar como "as políticas reais dan solucións reais" para as familias. "É o que vai ocorrer esta tarde e o que vai seguir ocorrendo ata que teñamos completadas esas 4.000 vivendas que prometemos antes de finalizar a lexislatura, que xa están na súa totalidade en marcha. Iso é política real, os contos deixámosllos para outros", afirmou.

DECRETO DE VIVENDA

   Precisamente, preguntado polos decretos aprobados este martes polo Consello de Ministros, o portavoz parlamentario do PPdeG, Alberto Pazos, asegurou "desconfiar" do que se aprobe neste órgano, como "desconfía en xeral de toda solución máxica". "O que non se fixo en oito anos non se vai a arranxar en 24 horas", manifestou para asegurar que "dicir o contrario á xente é enganala".

   Ademais, sobre o feito de que finalmente sexan dous e non uno os decretos, atribuíu este asunto á "imposibilidade de dúas forzas que están representadas no Goberno de chegar a un acordo nun único texto", algo que cualificou de "francamente vergoñoso".

   Despois de sinalar que cando chegou Pedro Sánchez á Moncloa a vivenda era a "décimo sexta preocupación dos españois" e agora é "a primeira". "Ese é o seu balance", censurou.

   Ademais, criticou que estes días a vicepresidenta do Goberno Yolanda Díaz chegase a pedir á xente que se manifeste en contra dun Executivo do que ela mesma forma parte. "Ten que decidir de que parte da pancarta está", subliñou.

   Tamén preguntada polos decretos, a viceportavoz parlamentaria do BNG, Olalla Rodil, apelou á prudencia até coñecer o detalle dos documentos e destacou que "todas as medidas dirixidas a protexer o dereito a unha vivenda son pasos adiante". Con todo, tamén se referiu ao feito de que finalmente sexan dous textos para asegurar que "mal se empeza se se quere soprar e sorber".

   Finalmente, a viceportavoz parlamentaria do PSdeG, Lara Méndez, puxo en valor as "solucións postas encima da mesa" por parte do Goberno e afirmou que "o importante non é que se aprobase hoxe no Consello de Ministros, senón que se aprobe no pleno extraordinario que se aprobe no pleno extraordinario convocado para o venres" e restou importancia ao feito de que sexan dous textos.

   "Que se aproben estas medidas para que sexan efectivas e non vexamos a ningunha Maricarmen máis na rúa porque ten que abandonar a súa vivenda na que leva vivindo 70 anos", afirmou.

   Tamén se referiu á "marea de xente nova" que estes días reclaman nas rúas ante a imposibilidade de acceder a unha vivenda digna. "Reclaman por Maricarmen pero tamén por eles mesmos", dixo para asegurar que a situación "obriga a actuar de forma inmediata e é o que está a facer o Goberno de España".

   Por último, lembrou que se chegou a este punto porque o Congreso rexeitou en anteriores ocasiones decretos que permitían medidas antidesahucios e a prórroga dos contratos de aluguer, entre outras.