O plan de eficiencia enerxética da Xunta aspira a aforrar case 100 millóns nos próximos dez anos
SANTIAGO DE COMPOSTELA, 23 Feb. (EUROPA PRESS) -
Case 5.100 desempregados beneficiaranse en 2012 das axudas á contratación dos paros de cooperación, tanto cos concellos coma con universidades e outras entidades sen ánimo de lucro. Para tal fin, a Consellería de Traballo e Benestar destinará 64,8 millóns de euros.
Anunciouno o presidente galego, Alberto Núñez Feijóo, na rolda de prensa posterior ao Consello da Xunta, na que destacou novidades como a tramitación electrónica do proceso e que se "intensificarán" os controis para verificar "in situ" que a prestación dos servizos subvencionados coincide co proxecto presentado.
A través destes programas, favorecerase a contratación de persoas que estean en situación de desemprego para a realización de obras ou servizos de interese xeral e social. Os plans de cooperación cos concellos chegarán a uns 4.000 beneficiarios e os restantes de carácter institucional a ao redor de 1.100.
Nesta ocasión, o presidente incidiu tamén en que se buscará a "maior implicación e compromiso" das entidades na consecución da posterior inserción laboral dos beneficiarios.
Igualmente, nesta convocatoria mantense a posibilidade, no caso das entidades locais, da contratación anticipada, ata un máximo de dúas contratacións, así como para os 12 membros non permanentes dos Grupos Municipais de Intervención Rápida (Grumir).
PLAN DE EFICIENCIA ENERXÉTICA
Por outra banda, Núñez Feijóo destacou que o plan de aforro enerxético da Xunta aspira a aforrar case 100 millóns nos próximos dez anos, tras a análise de 107 edificios públicos.
Os estudios dos que se fixo eco o presidente reflicten que as medidas de aforro e eficiencia permitirían aforrar máis do 20 por cento da factura e evitar a emisión á atmosfera de máis de 20.800 toneladas de CO2 ao ano.
Na actualidade, estanse a levar a cabo e iniciando unha ducia de proxectos de aforro en diferentes organismos da administración. Durante este exercicio implantaranse tamén sistemas de medición de consumo enerxético en catro edificios públicos con consumo superior a 8.000 MWh/ano.
