VIGO, 7 Ago. (EUROPA PRESS) -
O Festival de Cans recibirá este mércores, día 9 de agosto, o premio Alecrín da Cultura, concedido pola Federación de Entidades Culturais Galegas de Cataluña (Fegalcat).
Foi a asemblea desta federación, que agrupa a 14 entidades culturais galegas na devandita Comunidade, a que quixo conceder a Cans este premio á Promoción Cultural, valorando a traxectoria do certame no ano no que celebra o seu vixésimo aniversario.
A entrega destes premios terá lugar nun acto que se celebrará no Castelo do concello ourensán de Castro Caldelas, presidido pola alcaldesa da localidade, Sara Inés Veiga. Ao evento acudirá tamén o director do Festival, Alfonso Pato, que recollerá o galardón en nome de toda a organización, segundo explican nun comunicado.
Xunto con Cans, recibirán este premio outras personalidades como a escritora María Xosé Porteiro, en Literatura; o escultor Acisclo Manzano, en Artes, ou o grupo Leilía, en Música, após anunciar este ano a súa retirada dos escenarios.
