Galicia retoma as clases en todos os centros educativos o mércores ao rebaixarse o nivel de emerxencia

   SANTIAGO DE COMPOSTELA, 29 Abr. (EUROPA PRESS) -

   O presidente da Xunta, Alfonso Rueda, anunciou que Galicia "retoma o control da emerxencia" após a reunión, esta tarde de martes por videoconferencia, co ministro do Interior, Fernando Grande-Marlaska, na que se rebaixou o nivel de 3 a 2. Así, as clases volverán este mércores a todos os centros educativos, á vez que as escolas infantís (de 0 a 3 anos) funcionarán con normalidade.

   Diso informou o presidente do Goberno galego --nunha comparecencia sen preguntas celebrada na sede da Xunta este martes--, quen garante que "funcionarán con total normalidade todos os centros educativos de Galicia", así como as escolas infantís.

   Pola súa banda, a Delegación do Goberno indica que o ministro do Interior trasladou á Xunta esta baixada de nivel de emerxencia durante a reunión do Comité de Coordinación Operativa de Emerxencias (CECOD) na que tamén participou o delegado do Goberno, Pedro Blanco.

   Paralelamente, Rueda informa de que se decidiu ampliar dous días os prazos de procedementos administrativos que terminasen os días 28 ou 29 de abril. Unha medida que se publicará "de inmediato" no Diario Oficial de Galicia (DOG).

   Agora que a Xunta volve ter o control de mando, Alfonso Rueda xustificou solicitar o nivel 3 ao ser "totalmente comprensible" por tratarse dunha "emerxencia a nivel nacional". Xa coas novas circunstancias, decae ese control en mans do Estado e "todas as xestións pasan a ser coordinadas pola Xunta". Iso si, esixe "explicacións convincentes das causas" e "delimitar responsabilidades"

XORNADA DE CONFUSIÓN

   E é que a dificultade nas comunicacións que acompañou ao apagamento eléctrico que afectou o pasado luns á península ibérica, e do que parte do territorio non se recuperou até as primeiras horas deste martes, traduciuse en confusión para as familias e o persoal dos centros educativos e as escolas infantís da comunidade, sobre todo nas primeiras horas do día.

    Rueda anunciou na pasada xornada de luns que se suspendían as clases nos centros educativos e que tampouco habería actividade nas escolas infantís. A determinación da Xunta, en parte pola rede extensa de transporte escolar e con ánimo de aforrar combustible, era pechar os centros.

   A decisión adoptouse cando se declarou o nivel 2 de emerxencia e aínda tiña o mando a Administración autonómica, pero pouco despois activouse o nivel 3 e a coordinación pasou a mans do Goberno. A directriz foi que, aínda sen actividade lectiva, reabrisen os centros.

   Nesta conxuntura e dado que fallaban os teléfonos móbiles, houbo profesores, algúns consultados por Europa Press, que non recibiron até esta mañá as distintas directrices e practicamente á vez: a da pasada noite que determinaba a suspensión da actividade e a instrución que esta mañá clarificaba que debían estar abertos.

   O mesmo pasou coas familias: houbo centros privados e concertados que avisaron ás familias de que os centros funcionarían e mantiveron mesmo servizos complementarios, como o de comedor.

   Maior confusión houbo, se cabe, nas escolas infantís, dado que a directriz de reapertura non chegou aos equipos directivos das mesmas até avanzada a mañá. Houbo pais e nais que se atoparon carteis de "escola pechada até este mércores" e notificacións de directoras que afirmaban que non se renovaría a actividade até o día seguinte.

   Finalmente, só o 2,5% dos alumnos de colexios e institutos acudiron aos centros este martes, mentres que a asistencia en escolas infantís foi do 3,5%. Agradece Rueda a pais, nais e docentes, xa que "moitos non puideron recibir aviso até primeira hora da mañá".

    Defende Rueda a decisión anunciada na noite do luns de que se suspendían as clases cando "se confirmaba que o apagamento ía continuar" e "non se tiña certeza" de cando volvería a luz, unido ás recomendacións de aforro de combustible.

GOBERNO: "COLABORACIÓN ÁXIL"

    "Desde o primeiro momento tívose unha colaboración áxil, eficaz e coordinada coa Xunta de Galicia", resaltou a Delegación do Goberno na tarde deste martes.

   De tal forma, "desde a entrada do nivel 3 de emerxencia en Galicia os esforzos centráronse en garantir a subministración de electricidade nos centros hospitalarios e residencias de maiores".

   Igualmente, o Executivo central remarca que "se restableceu ao 100% a subministración eléctrica, a rede de datos móbiles e os servizos ferroviarios de Galicia".

    En materia de seguridade, o reforzo das Forzas e Corpos de Seguridade do Estado e a coordinación cos servizos de emerxencia e as policías locais "permitiu que a xornada discorrese con total normalidade e sen incidencias".

BALANCE DE NORMALIDADE

   Así mesmo, Rueda fixo un balance de como os servizos públicos han ir retomando a normalidade na comunidade. Destaca que todos os hospitais públicos xa funcionan con servizo eléctrico normal. Apunta que se priorizou o "máis urxente", pero agora retomarase o que "quedou sen facer" en función da prioridade, do mesmo xeito que asegura que os centros de saúde funcionaron a pesar das "lóxicas dificultades dadas as circunstancias".

   Detalla que na xornada do 28 de abril naceron 39 bebés "a pesar das dificultades". Tamén se trasladaron a urxencias a 16 persoas con ictus. Das 10.000 persoas con terapia respiratoria, 297 foron levados a hospitais ou PAC, á vez que 121 foron atendidos polo 061.

    As residencias funcionaron "con normalidade", a práctica totalidade con xeradores. Nos centros de día só houbo 44 dos 1.900 usuarios.

    Noutra orde de cousas, no sector primario "non constan grandes incidencias".

    Tendo en conta que se restableceu o 100% da subministración eléctrica, Rueda agradeceu o "civismo" dos galegos durante este apagamento. Tamén lembra a recomendación da Xunta de non bañarse en ríos e praias durante as próximas 24 horas pola falta de tratamento de augas durante a crise enerxética.