García Ortiz asegura que a Fiscalía Xeral "colaborará todo o que poida" para reducir os efectos da folga de LAJ

   SANTIAGO DE COMPOSTELA, 31 Mar. (EUROPA PRESS) -

   O Fiscal Xeral do Estado, Álvaro García Ortiz, asegurou que a Fiscalía "colaborará en todo o que poida" para reducir os efectos negativos derivados da folga de Letrados da Administración de Xustiza (LAJ).

   García Ortiz, en Santiago de Compostela para participar no curso participa no curso 'A protección do patrimonio histórico', organizado polo Consello Xeral do Poder Xudicial, comentou que a Fiscalía "vai estar aí, vai axudar".

   "Como sempre, imos estar a disposición das Administracións e os cidadáns para colaborar en todo o que se poida e evitar que os conflitos ou resolución de conflitos, poida afectar os cidadáns. Imos estar dando todo o que podamos para minimizar as consecuencias do que ocorreu", afirmou.

PROBLEMA "ESTRUTURAL" PARA O PRESIDENTE DO TSXG

   Este mércores, no marco das mesmas xornadas, o presidente do Tribunal Superior de Xustiza de Galicia, José María Gómez e Díaz-Castroverde, consideraba que a suspensión de actuacións procesuais (xa 17.000) que deixa a folga de letrados xudiciais, "unha cifra grave e importante", "deixa unha situación xa non conxuntural, senón estrutural, que haberá que absorber nos xulgados dalgunha maneira".

   "En Galicia temos experiencia, lamentablemente, en recuperación da actividade xudicial despois de circunstancias anormais como a folga do 2018 ou a pandemia. A realidade é que efectivamente será necesario establecer criterios de volta á normalidade, en coordinación co Consello do Poder Xudicial", sinalou.

   Segundo apuntou, ten as necesidades detectadas pero "non depende do Tribunal" pór solución a eses problemas.

   Preguntado pola posibilidade de que se celebren xuízos pola tarde, o presidente do TSXG comentou que "non é de sinxela execución" porque non só intervén o xuíz. "É prematuro facer este tipo de reflexións porque tamén hai que ter en conta que é o momento do día no que os xuíces ditan resolucións e fórmanse sobre a última xurisprudencia"

   "Toda a colaboración é boa pero non depende de min, nin do Tribunal Superior, establecer os criterios. En canto a aumentos do persoal, dependen da Xunta, do Consello Xeral do Poder Xudicial ou do Ministerio, algo que nós non podemos decidir", indicou.