SANTIAGO DE COMPOSTELA, 4 Jun. (EUROPA PRESS) -
O Goberno galego non quere símbolos políticos nos estadios. O secretario xeral para o Deporte, José Ramón Lete Lasa, considerou que a exhibición de bandeiras por parte do público durante os partidos, como a independentista galega ou co símbolo deseñado por Castelao de 'Denantes mortos que escravos', choca coa concepción do deporte como "elemento de unión e cohesión social", polo que resultan "incompatibles" co ideal defendido pola Xunta para os estadios.
"Debemos primar o deporte como elemento de unión e integración", defendeu, insistindo en que nestes espectáculos as bandeiras a enarborar deben ser deportivas, "do mesmo xeito que non entenderían que respondese a esta pregunta ataviado cunha camiseta do Racing de Ferrol", trasladou Lete Lasa en resposta a unha cuestión formulada por Luís Bará, deputado do BNG.
Precisamente Bará ilustrou o seu punto de vista cunha 'estreleira', a bandeira icónica do independentismo e nacionalismo galego de esquerdas, que situou na súa mesa durante a intervención, na que denunciou que estes símbolos están a ser "sistematicamente prohibidos" nalgúns estadios, cunha "actitude represiva por parte de autoridades e clubes" respecto dunha iconografía "que non é ilegal", citando casos como Pasarón.
O deputado nacionalista defendeu a exhibición destas bandeiras ou o canto do himno galego, por exemplo, como "manifestacións da confraternización da afección", mesmo entre rivais como o Deportivo ou o Celta, e en encontros de baloncesto como o Breogán e o Obradoiro.
"NON ESTÁ PARA FACER POLÍTICA"
O responsable de Deporte argumentou que estes encontros deben acoller a afeccionados como "adversarios deportivos e adversarios", como unha actividade "directamente relacionada cun modo de vida saudable e a adquisición de valores de superación, loita e o respecto aos demais" e que permite "xuntar a persoas de diversos credos e procedencias".
"Non está para facer política e usalo partidariamente", matizou quen, aínda trasladando o seu respecto por estes símbolos como manifestacións "lexítimas do pluralismo político", isto é "incompatible" coa idea de estados "para xogar fútbol, enfrontar afeccións e sentimentos". Por iso, defendeu "salvagardar a esencia do deporte" e que os valores de unión e cohesión "prevalezan sobre os que nos separan".
A pesar diso, lembrou que este tipo de cuestións "quedan fóra das competencias da Secretaría Xeral", dado que se trata dunha materia de regulación Estatal.
