Pesca.- A oposición acusa á Xunta de "alimentar" o conflito da mellixa, mentres Mar defende o "diálogo"

   SANTIAGO DE COMPOSTELA, 15 Nov. (EUROPA PRESS) -

   O BNG e o PSdeG acusaron á Xunta de "alimentar" o conflito entre mexilloeiros e 'percebeiros' polas zonas de recollida da mexilla a poucos días da apertura da fase de recollida e denuncian a "incapacidade" da Consellería do Mar de "propiciar un acordo". Mentres, o director xeral de Pesca, Acuicultura e Innovación Tecnolóxica, Antonio Basanta, defendeu a postura de "diálogo" e "man tendida" do departamento que dirixe Rosa Quintana.

   Na Comisión 8. de Pesca e Marisqueo, celebrada este martes no Parlamento de Galicia, a deputada do BNG Rosana Pérez criticou que a Xunta aprobase o decreto de maneira "unilateral".

   Así mesmo, a nacionalista destacou que a anterior orde que regulaba a extracción de fazula, do ano 2000, funcionou "durante 19 anos" dunha maneira "aceptable e razoable", ata que, engadiu, "en novembro de 2019 a Consellería aproba este decreto". "Non nos consta que ese decreto estivese falado e acordado cos afectados", sinalou Rosana Pérez.

   "A partir dese momento, as cousas só foron a peor e seguen a día de hoxe sen resolverse a piques de comezar outra campaña o próximo 1 de decembro", lamentou a deputada do BNG.

   Ademais, puxo en dúbida a "man tendida" prometida pola Xunta mentres "doutra banda se estaba publicando unha modificación das zonas de extracción que converteu a actividade nunha polvoreira". Uns cambios que, segundo a nacionalista, realizáronse "de maneira unilateral" e "un día antes de que empezase a campaña".

   Neste sentido, explicou que se trataba "dunha resolución de modificación das zonas de extracción da Consellería que se baseaba en criterios técnicos e que a Consellería cualifico de provisional e suxeita a cambios". "Non era crible (...) e só serviu para dinamitar as poucas pontes que quedaban entre a administración e os sectores", resolveu.

   Nesta mesma liña, demandou que facilite aos grupos parlamentarios os informes técnicos empregados tanto para a resolución de novembro como para a reapertura de zonas.

"INFLEXIBILIDAD"

   Pola súa banda, o deputado do PSdeG Julio Torrado cre que desde o ano 2019 "cada ano tentouse dar a volta á situación" a través de "promesas de diálogo que non se cumprían" e "promesas de apertura de zonas" das que, nestes momentos, asegurou, aínda non se sabe "nada".

   Así, criticou a "inflexibilidad" da Xunta para evitar un conflito entre 'bateeiros' e 'percebeiros' que "nunca tiveron problemas" ata que "a Xunta decidiu provocar un problema enorme".

   Torrado concluíu a súa primeira intervención preguntando ao director xeral de Pesca se a Xunta "está a alimentar o conflito a vontade". Neste sentido, afirmou que "aínda ten a posibilidade de resolvelo e de ser un Goberno que quere resolver o conflito e non mantelo".

"DIÁLOGO"

   Na súa quenda de palabra, o director xeral de Pesca, Acuicultura e Innovación Tecnolóxica, Antonio Basanta, defendeu que a Xunta "está no diálogo" e asegurou que "houbo e hai" oferta de flexibilizar "todos os condicionantes que regulan a extracción da fazula".

   "Estamos e estivemos na vía do diálogo. Queremos e ofrecemos ese diálogo e querémolo, como se sinalou na moción cuxo acordo se aprobou neste Parlamento, sen imposicións de ningún tipo", reivindicou Basanta.

   Deste xeito, o director xeral sostivo que mantiveron até dez reunións co sector 'bateeiro' e tamén coas federacións. En concreto, detallou "25 contactos en menos de 11 meses" para abordar o asunto que, na súa opinión, "non é máis que a punta do iceberg".

   Sobre os informes, sinalou que "non son unha foto fixa" porque "as condicións do mar son variables". En todo caso, trasladou que a Consellería do Mar "non se nega a axustar e a adecuar as zonas nas que non se pode extraer fazula".

   Ante estas circunstancias, Basanta insistiu en chamar ao "diálogo" e á "vontade de evitar tensións". Así, dixo estar seguro de que tanto os 'bateeiros' como os 'percebeiros' "están nesa liña", aínda que recoñeceu que pode haber "desavinzas" que, asegurou, "superaranse con sentido común".

   Despois desta intervención, a deputada nacionalista Rosana Pérez afirmou que darán "unha marxe" para observar se "prospera ese diálogo", mentres o deputado socialista Julio Torrado subliñou que o acordo entre as partes é sempre "o mellor", pero reiterou que nesas partes "está tamén a Xunta", que, ao seu xuízo, "debe contribuír á reflexión e ao acordo".

CRISE DE PREZOS

   Por outra banda, nesta mesma Comisión, o BNG tamén cuestionou as medidas anunciadas pola Xunta para paliar as consecuencias da crise da subida de prezos no sector pesqueiro.

   A deputada Rosana Pérez relatou que no mes de marzo, o por entón presidente da Xunta, Alberto Núñez Feijóo, anunciara un plan de choque para o sector pesqueiro con "tres medidas": a exoneración das taxas portuarias, a intensificación da campaña 'Galicia sabe aMar' e a axilización do pago das axudas que xa se concederon.

   Sobre esta última, Pérez criticou que non se trate "dunha medida de choque", senón de "facer o que se lle supón a un Goberno", é dicir, "pagar as axudas axiña que as ten concedidas". En canto ás taxas portuarias, a deputada nacionalista advertiu de que, despois de oito meses, "aínda non se puxo en marcha".

   Antonio Basanta avanzou que traballan para que o conxunto do sector teña axudas, con cargo aos Orzamentos de 2023, de "case 15 millóns de euros de axudas extraordinarias" vinculadas "ao impacto no sector durante o segundo semestre do 2022".

   Así, explicou que o obxectivo é que se convoquen no primeiro trimestre do próximo ano e que se abonen dentro do primeiros seis meses do ano. Deste xeito, Basanta detallou que teñen como finalidade "beneficiar á frota, á acuicultura e á cadea de transformación, que quedou fóra das axudas do Goberno central".

   A deputada nacionalista lamentou que as axudas se anunciasen en marzo e se vaian a pagar "un ano e medio despois". "Non se van a pagar esas axudas directas até 2023", censurou.