Pontón acode a Teo para arroupar ao candidato do BNG á Alcaldía e reclamar "máis e mellores servizos" para os veciños

SANTIAGO DE COMPOSTELA 9 May. (EUROPA PRESS) -

A portavoz nacional do BNG, Ana Pontón, desprazouse este martes ao concello de Teo (A Coruña), municipio veciño da capital galega, para arroupar ao seu candidato, Eloi Devesa, e reclamar "máis e mellores servizos" de atención aos veciños.

Con esta visita, a líder nacionalista salda a 'foto' pendente co candidato despois de que Devesa asumise o liderado da candidatura en substitución de Patricia Castelao, que renunciou a seguir encabezando a lista após ser ratificada pola asemblea. Así, Pontón acudira no seu día á presentación de Castelao, pero non á de Devesa, cuestión que queda resolta.

De feito, Pontón cualificou a Eloi Devesa como "unha persona moi preparada para poder afrontar os retos de futuro do concello, entre eles a atención do benestar da cidadanía". "Levamos tempo vendo como os 14 anos de goberno do PP supuxeron unha paralización de iniciativas e obras para mellorar a calidade de vida da xente maior", denunciou a portavoz nacional do Bloque, quen denunciou que "en todo este tempo non construíu nin unha soa residencia pública".

"Nun municipio como é Teo e no que os veciños levan moito tempo reclamando un centro de día, o que fixo o Goberno do PP foi botar abaixo o proxecto que xa existía para non construír este equipamento, fundamental para as persoas maiores", recalcou a dirixente nacionalista.

Fronte a iso, Pontón situou o modelo municipal do BNG, que pon "no centro ás persoas, o seu benestar e a súa calidade de vida, defendendo uns servizos públicos de calidade".

"MELLORAR A VIDA DAS PERSOAS"

"Apostamos por mellorar a vida das persoas e imos facelo tamén en Teo, porque merece máis oportunidades de futuro e estamos convencidos de que é posible un cambio", declarou a dirixente nacionalista sobre un concello que o BNG chegou a gobernar con Martiño Noriega á cabeza ata que abandonou a formación frontista en xaneiro de 2012 após a asemblea de ruptura de Amio.

Pontón incidiu en que o modelo da formación nacionalista onde goberna é "o modelo municipal que queren estender por toda Galicia a partir do 28 de maio". "No que estou convencida de que o BNG vai ter un resultado histórico con máis concelleiros", augurou.