Recursos de Galicia adquirirá un parque eólico entre Ribadeo e Trabada (Lugo) de 49,5 MW de potencia instalada

993355.1.260.149.20250708152838

   SANTIAGO DE COMPOSTELA, 8 Jul. (EUROPA PRESS) -

   A sociedade público-privada Recursos de Galicia (RDG) chegou a un acordo para adquirir o 100% do parque eólico Mondigo, situado na comarca lucense da Mariña Oriental, entre os municipios de Ribadeo e Trabada, que consta de 11 muíños con 49,5 MW de potencia instalada.

   Este primeiro proxecto de xeración da sociedade mixta composta pola Xunta e 32 empresas suporá a compra a Sinia Renovables, a división de fondos de investimento en enerxías renovables e sustentabilidade de Banco Sabadell, dun parque eólico que comezou en 2010 e cuxa maior parte da obra civil acaba de terminar.

    RDG informa nun comunicado de que a operación está suxeita a cláusulas suspensivas, de forma que o recinto só pasará a ser propiedade da sociedade mixta cando se certifique o final da súa construción e o seu correcto funcionamento, así como que ten todos os permisos preceptivos. Fontes do sector consultadas por Europa Press sitúan na contorna dos 70 millóns de euros o importe que podería alcanzar esta operación.

   A previsión é que o parque eólico empece a xerar enerxía de maneira regular antes de que conclúa este mesmo ano, cunha produción anual estimada de 131 GWh, que segundo RDG equivalería ao consumo eléctrico duns 38.000 fogares.

    O conselleiro delegado de RDG, Emilio Bruquetas, manifestou a súa confianza en que "proximamente" se leve a operación de compravenda a termo. "Isto suporía avanzar no cumprimento do noso plan estratéxico e situaríanos en condicións de alcanzar obxectivos clave como son, entre outros, combater o cambio climático, prover de electricidade competitiva aos galegos e estabilizar os custos para as nosas empresas ou, en definitiva, favorecer o emprego e a reversión do beneficio no territorio", afirmou.

ACCIONARIADO

   A Xunta de Galicia é o principal accionista de RDG. Por parte do accionariado privado están presentes Abanca; Martabela (Megasa e Finsa); Invernatur (Copasa, Valtalia e Gesuga); Cabicastro (Grupo Nogar, Grupo Pérez Rumbao, Conservas Rianxeira, Lucasiñas e Grupo Revi); Gadisa; Exlabesa; ARP Global; e Ence Terra, entre outros, até 32 empresas que sosteñen máis de 21.000 empregos directos e achegan ao ano un 14% do PIB da comunidade.

    A filosofía pola que en 2023 se creou RDG foi a de abaratar a enerxía que consomen os galegos, a través da participación en proxectos desenvolvidos no territorio e que empreguen os seus recursos naturais, así como axudar a descarbonizar a economía e estimular o trinomio enerxía-industria-sociedade.