Aconsella aos socialistas "mirar un pouco máis" a situación das súas filas antes de realizar peticións como a "intervención" de Gondomar
SANTIAGO DE COMPOSTEla, 13 Jul. (EUROPA PRESS) -
O conselleiro de Presidencia, Administracións Públicas e Xustiza, Alfonso Rueda, criticou este martes a proposta do PSdeG de solicitar ao Ministerio de Administracións Públicas que "interveña" o Goberno local de Gondomar (Pontevedra) e expresou o "máximo respecto" pola autonomía local.
"Creo que é o que deberiamos facer todos e non se instalar en dicir barbaridades buscando titulares", espetou Alfonso Rueda, en declaracións aos medios, antes de participar na sinatura dun convenio coa Federación Galega de Municipios e Provincias (Fegamp) para colaborar na implantación da e-administración.
Preguntado por se a Xunta secundará a petición dos socialistas, o tamén secretario xeral do PP galego rexeitou facer un pronunciamento expreso, pero lamentou que o partido que lidera Manuel 'Pachi' Vázquez estea instalado "na táctica de primeiro buscar titular e despois pensar o que di".
En ton irónico, o conselleiro insistiu en que "debería ser ao revés, pensar as cousas antes que os titulares", para aconsellar, ao tempo, aos socialistas "que miren un pouco máis" o que acontece nas súas filas, antes de realizar afirmacións do tipo das que fixo onte.
"Porque se esa é a táctica que decidiu -- por pedir que o Executivo estatal interveña os Gobernos locais con situacións como a de Gondomar--, igual debería empezar por aplicalo en concellos gobernados polo PSOE", argumentou, antes insistir en que "non é bo pensar só en titulares de prensa".
PETICIÓN
En concreto, a voceiro do PSdeG, Mar Barcón, anunciou este luns que os socialistas galegos pedirán ao Ministerio de Administracións Públicas que "interveña o Goberno municipal de Gondomar", en Pontevedra, que está apoiado por tránsfugas, porque os membros da corporación "están todos eles en cuestión" por tramas urbanísticas.
Nunha rolda de prensa, Barcón demandou, así mesmo, que a Xunta apoie esta reclamación ante o Executivo central porque o Goberno de Gondomar está "dende o punto de vista político e xudicial" baixo "moitas dúbidas", xa que, recordou a socialista, existen "evidencias" de que a corporación actual é "o resultado de prácticas escuras que foron e están sendo xulgadas".
Neste sentido, apuntou que os socialistas xa denunciaron en días pasados que neste municipio pontevedrés se produciu trama para "vulnerar" a legalidade urbanística a cambio de diñeiro negro para pagar campañas do PP. Así, Mar Barcón insistiu en que se "extorsionaron empresarios" e se "teceu unha rede de corrupción de diñeiro negro", o cal supón unha "vergoña para a política galega".
