A Xunta afirma que "mellorará tres postos no ranking" de autonomías e ao final de ano será a novena con menos débeda

SANTIAGO DE COMPOSTELA 14 Sep. (EUROPA PRESS) -

A Consellería de Facenda destacou nun comunicado que o seu ratio débeda/PIB se sitúa no 13,3% no segundo trimestre, o que a sitúa nove décimas por debaixo da media española. Ademais, asegurou que as previsións dos plans de reequilibrio aprobados polo Consello de Política Fiscal e Financeira (CPFF) "indican que Galicia mellorará tres postos no ranking" de autonomías e será a novena con menos endebedamento ao rematar 2012.

Neste sentido, indicou nunha nota que a súa débeda aumentará neste exercicio dez puntos porcentuais menos que a media das comunidades. A Xunta, sostén o departamento de Facenda, "mantivo durante toda a lexislatura un endebedamento controlado e emitiu tan só a porcentaxe aprobada cada exercicio" no CPFF. A finais de 2008, a ratio débeda/PIB estaba tres décimas por enriba da media e neste momento é nove décimas inferior, subliñou.

Neste período, a Comunidade galega absorbeu o 4,5% do endebedamento total, unha cifra "menor que a que lle correspondería por poboación". Así mesmo, Facenda indica que, se se inclúe a débeda das empresas públicas, "ten un diferencial positivo aínda maior, de 1,7 puntos", cunha ratio do 13,7%, fronte ao 15,4% de media. Iso significa, segundo o Goberno galego, que "a débeda das empresas públicas é tres veces menor que a media" e é a sétima autonomía con menor endebedamento.

Facenda explicou que dende 2008 Galicia é a terceira comunidade que menos aumentou o seu endebedamento e está 25 puntos por debaixo da media. Ademais, defendeu que a aprobación da lei de Disciplina Orzamentaria e Sostenibilidade Financeira "representa o compromiso do Executivo galego coa sostenibilidade das finanzas" no curto, medio e longo prazo para blindar o Estado do benestar".