A Xunta lanzará axudas para rehabilitar vivendas destinadas a traballadores en pequenos municipios

SANTIAGO DE COMPOSTELA, 27 Abr. (EUROPA PRESS) -

O presidente da Xunta, Alfonso Rueda, anunciou este luns que o Consello aprobou lanzar por primeira unha liña de axudas para rehabilitar vivendas en concellos de menos de 20.000 habitantes que vaian destinadas a traballadores en centros da contorna. "Queremos facilitar que vivan no rural as persoas que traballen alí", indicou.

Esta convocatoria bianual (2026-2027), conxunta das consellerías de Emprego, Comercio e Emigración e de Vivenda e Planificación de Infraestruturas e dotada de 1,5 millóns de euros, busca dar resposta tanto ás necesidades de man de obra do tecido produtivo --priorizando sectores estratéxicos-- como ás de acceso á vivenda das persoas traballadoras, á vez que se avanza na fixación de poboación e na vertebración do territorio galego.

Poderán beneficiarse das axudas os propietarios, usufructuarios ou cesionarios de uso desas vivendas por un prazo mínimo de 10 anos, xa sexan as propias empresas que contratan ou persoas físicas e concellos que se comprometan con elas a destinar os inmobles que rehabiliten os seus traballadores.

Para garantir a cobertura das vacantes laborais botando man --cando sexa necesario-- da atracción do talento exterior, Rueda explicou que á hora de valorar as solicitudes "terán prioridade" vivendas que sexan para persoas contratadas no marco do programa Retorna Cualifica Emprego ou que teñan unha bolsa Excelencia mocidade exterior (BEME) para estudar un máster na comunidade".

A orde, que se publicará no Diario Oficial de Galicia na primeira quincena de maio- recolle dúas liñas. Por unha banda, a destinada tanto ás empresas como ás persoas físicas que se comprometan con elas a destinar as vivendas que rehabiliten aos seus traballadores, dotada con 750.000 euros.

Por outra, a dirixida aos concellos que tamén subscriban coas empresas o oportuno instrumento xurídico, con outros 750.000.

Da contía total de 1,5 millóns, 600.000 euros corresponden á presente anualidade e os restantes 900.000 euros, á 2027.

LICITACIÓN DAS OBRAS EN VALDECORVOS, PONTEVEDRA

Por outra banda, o Goberno galego autorizou na súa reunión deste luns a licitación das obras de construción de 54 novas vivendas de promoción pública en Pontevedra. As vivendas situaranse na parcela 19, urbanizada pola Xunta en Valdecorvos, e serán financiadas exclusivamente con fondos propios.

O Executivo autonómico lembrou que a parcela foi cedida gratuitamente polo Concello de Pontevedra. A obra de construción será licitada por un total de 10.686.378,97 euros, aos que se sumarán case 350.000 euros da redacción do proxecto e dirección de obra, e os custos doutros traballos técnicos.

O custo será financiado integramente pola Xunta, sen achegas estatais nin europeas. O inmoble contará cun total de 24 vivendas de dous dormitorios (das que tres estarán adaptadas para o seu uso por persoas con mobilidade reducida), 24 vivendas de tres dormitorios e 6 de catro dormitorios. Todas contarán con trasteiro e praza de garaxe.

A Xunta destacou que, en total, ten en Pontevedra, en distintas fases de execución, 300 vivendas de promoción pública, incluídas as 54 cuxa obra se licitará proximamente.