Os dous rexedores preconstitucionais --Beade e Quintela de Leirado-- mantéñense e o PP cae en Taboadela tras a retirada de Manuel Gallego
SANTIAGO DE COMPOSTELA, 27 May. (EUROPA PRESS) -
Case todos os rexedores galegos que levan máis de 25 anos á fronte dos seus consistorios conseguiron revalidar as súas alcaldías nas eleccións municipais do pasado domingo 26 de maio. A única excepción márcaa o Concello de Vila de Cruces (Pontevedra), onde o PP de Jesús Otero perde a maioría absoluta ao acadar tres edís menos que en 2015.
Entre os alcaldes veteranos que renovan os seus gobernos figuran os dous rexedores preconstitucionais que perviven en Galicia, os das localidaes ourensás de Beade e Quintela de Leirado, onde os populares Senén Pousa e José Antonio Pérez manteranse nos seus cargos.
Así, segundo os datos consultados por Europa Press, os 17 mandatarios que acumulaban máis de tres décadas á fronte dos seus municipios conservarán o bastón de mando. E todos o fan con maioría absoluta. Tamén o fan 13 dos 14 rexedores que aspiraban a gañar para poder cumprir os 30 anos como primeiro edil das súas corporacións.
Por contra, no Concello de Taboadela (Ourense) produciuse un envorco histórico coa perda da maioría absoluta por parte do PP após catro décadas de goberno de Manuel Gallego (tamén preconstitucional), que ostentaba o título de rexedor máis lonxevo de Galicia até este ano, cando decidiu retirarse.
Deste xeito, o Partido Socialista podería gobernar no concello da comarca ourensá co apoio do edil logrado pola Candidatura Veciñal de Taboadela.
ALCALDES PRECONSTITUCIONALES
Coa retirada de Gallego só quedan en Galicia dous rexedores preconstitucionales: o de Quintela de Leirado, José Antonio Pérez, e o de Beade, Senén Pousa. Ambos permanecerán no cargo ao renovar a súa maioría absoluta, aínda que os resultados do 26 de maio foron dispares para o seu partido, o PP, nestes municipios da provincia de Ourense.
Mentres que o Partido Popular copará os sete asentos da corporación de Quintela de Leirado, en Beade perde un edil. No entanto, Senén Pousa, polémico por non ocultar a súa simpatía polo réxime franquista, reterá o bastón de mando ao quedar un edil por encima da maioría absoluta.
TODOS Os ALCALDES DE MÁIS DE 30 ANOS RENOVAN
Así as cousas, ademais de Pousa e Pérez, os restantes 15 alcaldes que até estas eleccións levaban máis de tres décadas no cargo reteñen o goberno dos seus municipios. A maior parte pertencen ao Partido Popular (11) polos catro do Partido Socialista.
Entre os rexedores populares máis veteranos que seguirán no cargo figuran Alfonso Balseiro (Mañón), José María López (Abadín), Manuel González (Baralla), José Manuel Mato (Paradela), Manuel Prado (Beariz), Manuel Penedo (O Irixo), Manuel Seoane (A Peroxa), Amador Vázquez (Vilamarín), José Luís Gavilanes (Xunqueira de Ambía), José Antonio Lorenzo (Mondariz-Balneario).
Tamén se manteñen á fronte dos seus consistorios os socialistas José Luís Raposo (Pedrafita do Cebreiro), José Manuel Pequeno (Dumbría), Alberto García (Catoira) e José Luís García (Brión). O primeiro logrou unha das maiorías máis amplas de toda Galicia ao rozar o 80% dos sufraxios emitidos en Pedafrita, o que permite ao PSdeG-PSOE ocupar oito dos nove asentos da corporación.
Por contra, tanto en Dumbría como en Brión e Catoira os socialistas perden apoios, aínda que isto non lles impide conservar o bastón de mando. Así, José Luís García seguirá outro catro anos como primeiro edil dun municipio que goberna desde 1979, o que inclúe ao de Brión na lista de alcaldes que permanecen no cargo desde a década de 1970 xunto con Manuel Seoane, Arturo Grandal, José Antonio Pérez, José Manuel Mato e Senén Pousa.
OUTRO CATORCE PODERÍAN EXCEDER A TRINTENA
Así mesmo, 13 dos 14 mandatarios que poderían pasar a trintena no mandato que arrincará o próximo mes de xullo lograron o obxectivo de reter as súas alcaldías. Do mesmo xeito que nos casos anteriores, todos o fan con maiorías absolutas.
Neste caso a totalidade dos rexedores que poderían ingresar no 'clube' dos rexedores con máis de tres décadas ás súas costas pertencen ás filas do Partido Popular. Ademais, tamén neste grupo aparece a única muller, María del Carmen González, alcaldesa de Carballeda de Valdeorras (Ourense) desde 1991 e que o pasado domingo conseguiu renovar a súa maioría absoluta.
Así as cousas, os seguintes alcaldes populares poderían cumprir 30 anos de goberno ao longo do próximo mandato son os seguintes: Francisco Quintela (Coirós), Armando Castosa (Cospeito), Joaquín González (O Saviñao), Francisco Rodríguez (Chandrexa de Queixa), Antonio Rodríguez (Montederramo), Manuel Pérez (Padrenda), José Luís Valladares (San Cristovo de Cea), Gumersindo Lamas (Sarreaus), José María Belo (Valga) e María del Carmen González (Carballeda de Valdeorras).
A única excepción ao pleno de vitorias entre os alcaldes veteranos pona o de Vila de Cruces (Pontevedra), Jesús Otero, que cae por baixo da maioría absoluta ao perder tres edís.
Outro dos casos de históricos alcaldes sufriron un revés foi o do municipio coruñés da Baña. Alí, o popular Andrés García Cardeso podería perder o bastón de mando 24 anos despois após deixarse un edil e quedar por baixo do limiar da maioría absoluta.
