UVIÉU, 14 de Payares (EUROPA PRESS)
L'escritor Xandru Fernández resultó ganador de la XIV edición del premiu de poesía en llingua asturiana 'Xuan María Acebal', que concede la Conseyería de Cultura y Turismu del Principáu, pol poemariu tituláu 'Les vides incompletes'. El xuráu que concedió esti galardón taba presidíu pola directora xeneral de Promoción Cultural y Política Llingüística, Consuelo Vega Díaz. Otros nueve trabayos optaben a esti premiu, dotáu con 7.000 euros.
El xuráu, qu'adoptó la so decisión por unanimidá, destacó la gran potencial espresiva del llinguaxe, y el dominiu y variedá de los recursos formales al serviciu de la construcción de los poemes, según informó la Cosneyería nuna nota prensa.
Xandru Fernández (Turón, 1970), llicenciáu en Filosofía pola Universidá d'Uviéu y profesor nel Institutu d'Enseñanza Secundaria (IES) de Lluanco, ye ún de los autores más productivos de la segunda xeneración del Surdimientu.
Autor de cuatro poemarios y ocho noveles en llingua asturiana, ye tamién conocíu pola so faceta de lletrista musical, mui especialmente como collaborador del grupu de rock Dixebra. El so trabayu como narrador y poeta foi yá reconocíu con premios como'l 'Xosefa Xovellanos' de novela (años 1994 y 1999) o'l propiu 'Xuan María Acebal' de poesía, que ganó nel añu 2000.
