O director xeral adxunto executivo de Novacaixagalicia, Javier García de Paredes e Mouro, tamén se prexubilará, aos seus 51 anos, e abandonará a entidade o próximo 30 de setembro, para cando está prevista a ampliación de capital do banco pola cal entrará o Fondo de Reestruturación Ordenada Bancaria (FROB).
García de Paredes, procedente de Caixa Galicia, foi nomeado para o seu actual cargo en abril de 2010, co nacemento de Novacaixagalicia, froito da fusión das dúas caixas galegas. Agora, unha vez realizada a conversión da caixa en banco, o executivo sairá da entidade e non participará no novo proxecto financeiro.
O director adxunto, que tamén ten un contrato de alta dirección, imita a decisión do que era director xeral de Novacaixagalicia, José Luis Pego, quen deixou todos os seus cargos na entidade aos 54 anos e fixo efectiva a súa saída ao tempo que se constituía formalmente NCG Banco, un trámite completado o mércores da semana pasada. Tamén deixou a caixa unha dos responsables do proceso de integración e directivo procedente de Caixanova, Óscar Rodríguez Estrada.
García de Paredes, nacido en Ávila en 1960, é licenciado en dereito pola Universidade de Salamanca, máster en Asesoría Xurídica de Empresas polo Instituto de Empresa de Madrid e diplomado en dereito urbanístico pola Fundación Universitaria San Pablo-CEU. Tras pasar por varios despachos de avogados, en 1987 incorporouse á Caixa como responsable da asesoría xurídica da dirección de Madrid.
Doce anos despois, en 1999, comezou a súa traxectoria en Caixa Galicia, onde entrou como director adxunto de relacións xurídicas, tras o que pasou a ser no ano 2000 director xeral adxunto e secretario xeral.