22 años de la muerte de Charles Bukowski

MADRID, 9 de Marzu (EDIZIONES)

Cúmplense 22 años de la muerte de Charles Bukowski, autor d'obres como 'El carter', 'Escritos de un viejo indecente', 'La senda del perdedor' o 'Factotum'. Criticáu y allabáu a parte iguales, el so estilu agresivu y porcaz nun dexó indiferente a naide y recuéyese nuna singular obra que cuenta con seis noveles, 14 ensayos y una montonera de poemes.

Nacíu n'Alemaña, la so familia treslladóse a Estaos Uníos cuando tenía trés años. Bukowski creció nun barriu probe, daqué que marcó la so obra y que se reflexa nos sos testos. L'escritor y poeta estaounidense ye unu de los representantes de los movimientos del Realismu puercu y la Ficción transgresiva.

Los protagonistes de los sos relatos, prostitutes, alcohólicos o folgazanes, son personaxes marxinales que nun alcuentren el so llugar nel mundu. Unu de los más recurrentes ye Henry Chinaski, el so alter egu, qu'apaez en toles sos noveles, sacante en 'Pulp'. Precisamente l'elementu autobiográficu ye una característica de tola so obra.

Igual que les noveles, los sos poemes y relatos cortos tán escritos con un llinguaxe directu, aspru y nada líricu. La so obra acoyóse de distinta forma n'Europa y Estaos Uníos. La so faceta como poeta tuvo más éxitu nel so país, mientres que nel vieyu continente fueron les sos noveles les más celebraes.

Tres una vida escéntrica y con más solombres que lluces, Bukowski finó'l 9 de marzu de 1994 a los 73 años por mor de la leucemia. Nel aniversariu de la muerte del escritor, recordamos diez de les sos cites más emblemátiques.

CONOCENCIA

"La conocencia si nun sabe aplicase ye peor que la inorancia", 'Escritos de un viejo indecente' (1969).

AMBICIÓN Y GALBANA

"La mio ambición ta llendada pola mio galbana", 'Factotum' (1975).

EDUCACIÓN

"La educación yera la nueva divinidá, y los homes educaos los nuevos poderosos facendaos", 'Mujeres' (1978).

VALIENTES Y COBARDES

"La diferencia ente un valiente y un cobarde, ye qu'un cobarde piénsalo dos veces antes de saltar a la xaula con un lleón. El valiente simplemente nun sabe lo que ye un lleón. Namás cree que lo sabe", 'Escritos de un viejo indecente' (1969).

EL DOLOR

"El dolor yera pa mi namás como la mala suerte: inorábala", 'La máquina de follar' (1974)

LA VIDA

"La definición de la vida ye problemes", 'Se busca una mujer' (1973).

ESPERANZA

"Eso yera tolo qu'un home precisaba: esperanza. Yera la falta d'esperanza lo que fundía a un home", 'Factotum' (1975).

AMOR Y ODIU

"Cuando amor ye una orde, odiu puede tornar nun placer", 'Escritos de un viejo indecente' (1969).

LA HUMANIDÁ

"Da-y daqué al xéneru humanu y raspiaránlu, y aruñaránlu y mayaránlu", 'La máquina de follar' (1974).

SENTIR Y AMAR

"Les persones amorales sentíense más llibres, pero nun teníen la capacidá de sentir o amar", 'Mujeres' (1978).