La Academia de la Llingua entama un ciclu d'alcuentros pa compartir el so llabor col públicu

   UVIÉU, 12 Jun. (EUROPA PRESS) -

   La Academia de la Llingua Asturiana entama el próximu 17 de xunu de 2025 a les 19.30 hores los 'Alcuentros na ALLA', un ciclu onde los y les académiques van ufrir al alderique les sos reflexones, análisis y vivencies en rellación cola so xera na Academia.

   Según detallen n'una nota de prensa unviada esti xueves, en cada alcuentru, un miembru de la institución va proponer un tema concretu pa que'l públicu, d'un mou específicu y sistemáticu, vaya dirixendo la esposición, pente medies d'entrugues o comentarios concretos, a lo llargo d'una hora.

    El próximu 17 de xunu de 2025, a les 19.30 hores, el presidente de la institución, Xosé Antón González, abre'l ciclu con 'L'ALLA, camín del mediu sieglu nel llabor normativu y tutelar', onde, tres d'una pequeña presentación de la temática que se propón abordar, el públicu asistente va tener la oportunidá d'entrugar al académicu de la llingua asturiana sobre'l so trabayu y esperiencia nesa estaya del llabor de la institución.

   L'Academia aguarda por que'l resultáu d'esti ciclu d'alcuentros seya granible y algame a esparder y desplicar d'una manera más específica y personal el llabor históricu y de futuru de la institución y los sos integrantes. D'esta miente, la frecuencia prevista ye trimestral y el llugar d'alcuentru ye'l propiu llar de la institución.