'Afinidaes Electives' vuelve a Asturies p'afondar na pluralidá llingüística y la lliteraria

   UVIÉU, 24 Jun. (EUROPA PRESS) -

   Siete llibreríes asturianes independientes van acoyeren los meses de xunu y setiembre, alcuentros ente autores na sesta edición del programa 'Afinidaes Electives. Alcuentros lliterarios en llibreríes'. La iniciativa, puesta en marcha en 2020 pol Ministeriu de Cultura al traviés de la Dirección Xeneral del Llibru, del Cómic y de la Llectura, consiste nel diálogu ente dos creadores, escoyíos pola llibrería qu'entama l'actividá, y qu'escriben en distintes llingües d'España.

   Nes conversaciones va proponese a cada autor esquizar nel trabayu y na obra del otru, buscando semeyances, conexones o caminos diverxentes, según informó'l Ministeriu en nota de prensa. Los alcuentros programaos n'Asturies van tener llugar del 25 de xunu al 27 de setiembre nes siguientes llibreríes independientes.

   La llibrería Treito, con Noemí Sabugal (castellán) y Xaime Martínez (asturianu), el 25 de xunu; en Matadero Uno, con Abel Aparicio (castellán) y Arantza Margolles (asturianu), el 12 de setiembre; La Madriguera, con Irma Borges (castellán) y Pablo Fraile (asturianu), el 13 de setiembre; Kafka & Co, con Alba Cid (gallegu) y Xaime Martínez (asturianu), el 13 de setiembre; La Pilarica, con Francisco Priegue (asturianu) y Emma del Pilar Pedreira (gallegu), el 25 de setiembre; La crisálida, con Àngels Gregori (valencianu) y Daniel García (asturianu), el 26 de setiembre; y La Revoltosa, con Uxue Alberdi (euskera) y Francisco Álvarez (asturianu), el 27 de setiembre.

ACCESU LLIBRE

   Estes actividaes son d'accesu llibre y gratuitu pal públicu. El programa tien como oxetivos principales "impulsar l'actividá en llibreríes independientes y poner en valor la pluralidá llingüística del nuesu país", favoreciendo'l diálogu y contribuyendo al espardimientu de lliteratures de distintos territorios.

   Nesta edición van participar un total de 130 autores, 65 muyeres y 65 homes, coles mires de favorecer la paridá nel sector. Dellos nomes que van formar parte del programa anguaño son Mario Obrero, Clara Usón, Xesús Fraga, Katixa Agirre, Ismael Ramos y Luz Pichel.