MADRID/OVIEDO, 13 Sep. (EUROPA PRESS) -
La película 'Alcarrs', de Carla Simón, foi la película española escoyida polos académicos pa representar a España nos premios de l'Academia de Hollywood, que se van celebrar el próximu 12 de marzu de 2023.
Los académicos yá escoyeron el pasáu mes d'agostu les trés cintes finalistes d'ente 42 llargumetraxes estrenaos ente'l 1 de xineru y el 30 de payares de 2022. Na carrera quedáronse fora finalmente 'Cinco llobinos', d'Alauda Ruiz de Azúa, y 'As bestas', de Rodrigo Sorogoyen.
Agora, 'Alcarrs' entama'l so camín pal Oscar esperando a conocer si entra nel primer corte de l'Academia, la conocida como 'shortlist' de diez títulos, que se va conocer el próximu 21 d'avientu. A finales de xineru anunciarán los cinco finalistes d'esta categoría a meyor película estranxera.
L'añu pasáu la candidatura española recayó en 'El bon patrón', de Fernando León de Aranoa, que nun consiguió entrar nos cinco finalistes de los Oscar.
En conociéndose la candidatura, Simón esplicó qu'una de les fortaleces de 'Alcarrs' de cara a los Oscar ye'l barafuste internacional qu'acumuló dende'l so estrenu, incluyendo l'Osu d'Oru na Berlinale. "Tamos perbién acompañaos, anque la primer vegada que presentes una película nun país ye un pocu incógnita", reconoció.
El primer desembarcu de 'Alcarrs' n'Estaos Xuníos va ser col Festival de Cine de Nueva York, qu'empieza'l próximu 30 de setiembre. "N'Europa la xente conectó cola película igual que n'España, pero porque ye daqué que se siente como mesmo al tar l'agricultura en crisis", esplicó la cineasta catalana.
Ye por ello que reconoz nun saber cómo va conectar el públicu americanu con esta cinta, magar que tien "muncha esperanza" porque l'agricultura nun ye la tema principal. "Más allá de l'agricultura, la tema principal de la película ye la familia y toos tenemos una, asina que a ver qué pasa", apuntó.
Simón reconoció que pasó los momentos previos al anunciu "distrayendo los nervios" con escenes de películes de Godard, el cineasta francés fináu esti martes. "¿Pa quién nun foi importante Godard? foi una noticia bien fuerte porque toos sabíamos que diba pasar, pero yera daquién casi inmortal", homenaxó.
UN FÍU Y "LOS PIES NEL SUELU"
En videollamada dende Barcelona, Simón reconoció ser "bien supersticiosa" ya intentar "nun pensar demasiao" na posibilidá de llegar a la ceremonia. "Entá nun tengo una llista de deseos de coses que me gustaríen que pasaren si vamos, pero sí tengo una promesa con un tíu mio, fanáticu de los Oscar, que-y dixi que si ganábamos vendría como acompañante", comentó con humor.
La directora de 'Branu 1993' --que tamién foi escoyida nel so momentu como candidata española a los Oscar, anque nun consiguió pasar la corte-- almitió qu'estes situaciones son "momentos bien contradictorios". "Lo vivo con muncha ilusión y ganes y encántame viaxar y presentala, pero ye daqué que te quita de tiempu pa escribir y pensar no siguiente. Nesti tiempu tuvi un fíu y eso ye lo que más te pon los pies nel suelu", indicó.
Pela so parte, la productora de Elastica Films María Zamora reconoció que la carrera pal Oscar ye daqué que se va construyendo adulces" y Berlín foi puntu de partida. El productor de 'Alcarrás', Stefan Schmitz, confirmó que la película volverá tener un rellanzamientu en sales y qu'entá "queda un llargu percorríu".
