Andecha Astur apoyará una candidatura electoral baxo'l nome de Conceyu Abiertu

UVIÉU, 03 de Febreru (EUROPA PRESS)

La organización política Andecha Astur concurrirá a les elecciones, non como tala, sinón apoyando una candidatura que se nomará Conceyu Abiertu, tanto pa les llocales como pa les autonómiques. La organización tomó esta iniciativa tres nun llegar un acuerdu con Bloque por Asturies y Unidá Nacionalista Asturiana, pa integrar la coalición electoral qu'estes dos formaciones anunciaron ayeri.

El voceru d'Andecha Astur, Mario Arbesú, aseguró en declaraciones a Europa Press que'l so partíu mostró de primeres disposición a llegar a un acuerdu con BA y UNA pa formar una candidatura única.

"Llevamos muncho tiempu defendiendo una xunidá d'aición elleutoral, y de primeres por supuesto que tábamos abiertos, y creíamos que yera lo más positivo llegar a les elecciones de mayu con una única candidatura dende'l nacionalismu d'izquierda", esplicó.

Sícasí, según Arbesú esta posiblidá ta descartada dafechu porque "hubo una serie de contactos tanto col Bloque como cola UNA y nun foi posible por distintes razones llegar a esa candidatura única". "Concretamente, nel casu d'UNA, simplemente porque nun yera posible compartir la mesma mesa de negociación con ellos, porque entendíen que nosotros nun representábamos a Andecha Astur", señaló, en relación al conflictu de sigles qu'enfrenta a actuales y antiguos militantes d'esta formación.

"A nosotros", esplicó, "llégamos too ya fecho. Bloque y UNA tienen un acuerdu políticu que nun conocemos, y yá escoyeron candidatu. Nosotros nun tomamos parte neses decisiones, polo tanto cualquier ofrecimientu políticu llega tarde yá", afirmó.

"Polo qu'apostamos agora ye pola xunidá d'aición dende la base", añadió'l voceru de la organización. Refierse al proyectu de concurrir n'agrupaciones d'electores nos conceyos onde-yos seya posible conformar llista. A nivel autonómicu concurrirán con una candidatura única. N'ambos casos, la marca electoral será Conceyu Abiertu.

Según Abersú, esti proyectu apóyalu Andecha, pero tamién xente d'otres organizaciones sindicales, sociales y vecinales.