Anxelu González Fernández lleva'l X Premiu Alfonso Iglesias de Cómic con 'Cacique blancu'

Publicado 02/10/2018 18:09:16CET

UVIÉU, 2 Oct. (EUROPA PRESS) -

L'ilustrador Anxelu González Fernández ye'l ganador de la décima edición del Premiu Alfonso Iglesias de Cómic cola obra 'Cacique blancu'. El gallardón, entamáu pol Gobiernu d'Asturies, tien una dotación de 3.000 euros.

El xuráu encargáu de valorar les obres presentaes axuntó esti martes baxo la presidencia del director xeneral de Planificación Llingüística y Normalización, Fernando Padilla Palicio, y tuvo formáu pol artista gráficu Alberto Vázquez García, ganador de la edición pasada; Carolina González Rodríguez, autora de cómics; y Ernesto García del Castillo, Neto, autor de cómics y humorista gráficu.

A esti gallardón podíen presentase cómics d'estilu, tratamientu y tema llibres, escritos en llingua asturiana y con una estensión mínima de cincuenta páxines, siempre que fueren inéditos y non premiaos n'otros concursos, anque para participar yera suficiente presentar un proyectu inicial de pelo menos quince páxines.

Ente les obres presentaes, el xuráu decidió conceder el Premiu al cómic tituláu 'Cacique Blancu', destacando, como consta nel acta, que ye "una propuesta innovadora no gráfico y narrativo, na que destaca l'usu espresivu del color pa conformar una historia interesante y desconocida". El testu presentóse col seudónimu 'Astro' y n''abriendo la plica, l'autor ganador resultó ser Anxelu González Fernández.

Anxelu González Fernández ye un ilustrador de trayectoria profesional dilatada. Trabayó pa delles editoriales (Pintar-Pintar, Satori, Zander, Asturtoons) en proyectos de lliteratura infantil, proyectos educativos y cómics; imparte talleres d'ilustración y diseñu gráficu y tien la so propia empresa de creación d'imáxenes corporatives y publicitaries.