UNA aprecia dexación de funciones del alcalde de Nava por permitir a Fuensanta facer obres sin llicencia

UVIÉU, 07 de Setiembre (EUROPA PRESS)

Unidá Nacionalista Asturiana, ante los datos facilitaos por Asturianistes por Nava, aprecia dexación de funciones per parte del alcalde de Nava, Claudio Escobio, al dexar que Fuensanta ficiere obres sin llicencia, según informó la organización al traviés d'una nota prensa.

La formación informó que'l primer edil dio'l so preste a l'actuación "conociendo tala circunstancia dende l'añu 2006, y sin qu'actuare pa tornar tala actuación como-y esixe la normativa urbanística".

Dende Unidá Nacionalista Asturiana tase a la espera de la resolución del espediente sancionador entamáu por Confederación Hidrográfica y de los trámites que ta llevando alantre la Cuota (Comisión d'Urbanismu y Ordenación del Territoriu del Principáu de Asturies), pa decidir qué tipu d'actuaciones xudiciales llevar a cabu.

Según UNA, de les actuaciones feches hasta'l momentu, "remanez claramente que les obres de Fuensanta ficiérense sin les necesaries llicencies municipales, como reconoz el mesmu Conceyu, y que l'alcalde yera conocedor de tala circunstancia per un informe del Seprona del 2006".

Ante tales circunstancies, UNA considera qu'hai "una evidente responsabilidá per parte del Alcalde de Nava, yá que como recueye l'artículu 249 del Testu Refundíu de la Disposiciones vixentes en materia de Urbanismu del Principáu d'Asturies (TR 1/2004 de 22 d'abril) tala responsabilidá esiste per parte de les autoridaes y emplegaos públicos cuando toleren y dexen d'exercer les potestaes d'inspección, llegalización, iguay sanción de les infracciones urbanístiques".