Arturo Fernández protagonizó 'Rogelia' y 'Jandro', dos de les películes más recordaes del cine asturianu

WIKIPEDIA.

UVIÉU, 4 Jul. (EUROPA PRESS) -

L'actor asturianu Arturo Fernández, que morrió esti xueves en Madrid a los 90 años d'edá, protagonizó dos de les películes más recordaes d'ente toles rodaes n'Asturies a lo llargo de la dictadura franquista; 'Rogelia' y 'Jandro'.

Arturo Fernández, nacíu en Xixón en 1929, foi ún de los actores teatrales más relevantes de la historia recién d'España, algamando grandes éxitos coles sos comedies, enllenes d'humor, tanto nel teatru como na televisión.

En 1950 treslladóse de la so Asturies natal a Madrid y empezó nel cine como figurante, anque bien ceo llogró papeles protagonistes onde se consolidó cola so imaxe de galán y conquistador cínicu.

Sicasí, el xixonés nun dexo de llau la so tierra natal, a onde volvió en 1962 pa rodar 'Rogelia', dirixida por Rafael Gil. Trátase d'un melodrama rodáu na fabrica de la daquella conocida como Ensidesa. Ta basada na obra de Palacio Valdés con violencia y amores prohibíos en metá de la industrialización, anque tresportando la historia a l'Asturies d'aquel momentu.

Acompañaron a Arturo Fernández na pantalla'l prestixosu actor gallegu Fernando Rey y l'actriz mexicana Pina Pellicer, que llegó a rodar xunto a Marlon Brando el western 'El rostru impenetrable'.

Con too, l'aportación mayor d'Arturo Fernández a la cinematografía asturiana llegó en 1964 col llargumetraxe de Julio Coll 'Jandro'. Trátase d'una coproducción ente Arxentina y la productora rexonal Asturias Films que fala d'una familia de mineros que medra económicamente al principiar la esplotación de la mina de La Camocha, en Xixón.

La cinta, protagonizada por Arturo Fernández, foi un éxitu de crítica y públicu y ye l'únicu exemplu de cine de producción asturiana rodáu a lo llargo de los años del franquismu.

L'actor Arturo Fernández taba hospitalizáu na clínica Ruber por problemes de salú polos que tuvo que suspender la so actuación de la obra 'Alta Seducción' nel Teatru Amaya de Madrid compartiendo escenariu con Carmen del Valle.

Depués del so fallecimientu'l Conceyu de Xixón decretó trés díes de llutu oficial, nos que les banderes van tar a mediu estil pol fallecimientu d'Arturo Fernández, que va tener un veloriu nel Teatru Xovellanos. El funeral y entierru va ser el sábadu 6 de xunetu.