Asturies llanza una campaña de bonos pa impulsar el turismu rural

UVIÉU 4 Sep. (EUROPA PRESS) -

El Gobiernu del Principáu presentó esti xueves en Cangas la so campaña de bonos turísticos destinada a fomentar les estancies n'agospiamientos rurales ente'l 16 de setiembre y el 31 d'avientu.

La iniciativa cuEnta con una inversión de 600.000 euros y va dexar emitir hasta 8.000 vales dixitales, coles mires de xenerar un impactu económicu estimáu de trés millones, según informó'l Gobiernu asturianu al traviés d'una nota de prensa.

Cada bonu ufierta un descuentu directu de 75 euros en reserves de siquiera dos nueches consecutives. Funcionen como tickets prepagos, cofinanciaos ente l'usuariu y el Principáu, y van poder utilizase en cerca de 200 agospiamientos rurales arrexuntaos. Cada viaxeru va poder beneficiase d'hasta dos bonos, descargables en formatu dixital dende la web o per aciu d'un códigu QR compatible con aplicaciones tipu wallet.

Nel casu de cases d'aldega de contratación íntegra y apartamentos rurales, va ser posible aplicar dos bonos nuna mesma reserva siempre que se contraten cuatro o más places.

Mentres la presentación, la vicepresidenta del Principáu, Gimena Llamedo, destacó qu'esta campaña ye una invitación a abrazar l'Asturies más auténtica, la qu'atopamos nos nuestros pueblos, nes nuestres cases d'aldega, na hospitalidá de la xente.

Amás, sorrayó que la elección de Cangas como escenariu del actu nun ye casual, yá que se trata d'ún de los conceyos afectaos poles quemes del branu, al pie de Somiedu, Ibias, Degaña, Ponga, Casu y Cabrales. Queremos que los bonos sirvan tamién como preséu de sofitu a estes zones y contribuyan a la so recuperación, añadió Llamedo, acompañada pola viceconseyera de Turismu, Lara Martínez, y l'alcalde de Cangas, José Luis Fontaniella.