Barbón quier axuntase coles CCAA vecines p'ameyorar la rempuesta énte quemes forestales

  UVIÉU, 25 (EUROPA PRESS)

El presidente del Gobiernu asturianu, el socialista Adrián Barbón, dixo esti llunes que la so intención ye la d'abordar coles comunidaes autónomes llimítrofes (Galiza, Castiella y Llión y Cantabria) un trabayu pa garantizar una rempuesta "muncho más rápida y eficaz" énte les quemes forestales.

Barbón, nuna rueda de prensa posterior al Conseyu de Gobiernu, dixo qu'esi trabayu ye necesariu, yá que se ta comprobando que los fueos puen treslladase d'una comunidá a otra. D'ende la necesidá de "cortocicuitar" esa situación.

"Vamos convidar a un trabayu a los nuestros gobiernos autonómicos vecinos pa ver cómo podemos coordinar esa rempuesta de forma qu'ente les cuatro comunidaes del Noroeste podamos abordar esa cuestión" , esplicó.

Amás, Barbón dixo que ye necesario reforzar la prevención énte una nueva tipoloxía de quemes. Asina, anunció que l'Executivu asturianu tien previstu impulsar un cume o congresu a nivel internacional, que se celebraría nel Principáu, col própósitu d'analizar bones práctiques y los meyores modelos en prevención y llucha contra les quemes. L'oxetivu, dixo, ye reforzar el sistema, pero tamién aprender de la esperiencia internacional d'otros países.

FONDU CONCEYOS

Barbón recordó que tres de la fola de quemes qu'hubo n'Asturies nel 2023 activáronse yá conclusiones, una d'elles referente a la dotación a los conceyos con un fondu plurianual de 18 millones pa infraestructures rurales y defensa contra esti tipu de sucesos.

El dirixente asturianu referíase asina a un alcuerdu del Conseyu de Gobiernu d'avientu del 2023 que daba lluz verde a la firma de dellos convenios de collaboración con 74 conceyos pa la meyora d'infraestructures y prevención de quemes. Los alcuerdos tendríen una vixencia de cuatro años, movilizaríen la inversión de 18 millones y dexaría a los conceyos planiar actuaciones oportunes hasta l'añu 2026.

La intención de Barbón ye "reforzar" esi fondu y que'l dineru vaya destináu específicamente a protexer l'entornu de los pueblos que puedan ser afectaos. "Queremos que vaya nos presupuestos pal añu 2026", indicó.