Beber alcohol de forma moderada amenorga un 50% el riesgu de morrer

Reuters

MADRID, 25 Ago. (EUROPA PRESS) -

Consumir bebíes con alcohol ente una y dos veces al día --nunca más de tres-- reduz cuasi un 50 por cientu'l riesgu de morrer en persones mayores de 55 años, en comparanza colos astemios y los "grandes bebedores", según los resultaos d'un estudiu realizáu pola Universidá de Texas (Estaos Xuníos).

La investigación, publicada na revista 'Alcoholism: Clinical & Experimental Research', contó con la participación de 1.824 voluntarios (1.142 homes y 682 muyeres) ente 55 y 65 años que, por 20 años, fueron estudiaos conforme a la so cantidá d'alcohol diario inxerío, los sos factores sociodemográficos y la so salú xeneral.

D'esti mou, los científicos estaunidenses compararon los índices de muerte contando colos factores condicionantes y comprobaron que los astemios y los "grandes bebedores" --tres o más bebíes diaries-- teníen unes tases de muerte un 49 y un 42 por cientu superiores, respectivamente, en comparanza colos bebedores moderaos.

"Mientres que l'abusu del alcohol ta rellacionao con una gran variedá de complicaciones médiques, la evidencia epidemiolóxica amuesa que'l consumu moderáu ta rellacionáu cola reducción de la muerte total", comenta l'autor del estudiu, Charles J. Holahan.

Amás, "esti ye un de los primeros estudios rellacionaos col consumu d'alcohol y la salú que nun tien sólo a bebedores y nun bebedores, tamién abarca dende los astemios hasta los grandes bebedores pasando polos que mantienen un consumu moderáu", apunta esti espertu, profesor del Departamentu de Psicoloxía de la universidá texana.

Sobro l'alta tasa de muerte presentada polos astemios, Holahan señala que "les persones que nun consumen nada d'alcohol mostráronse significativamente más daes a tener otros problemes como obesidá, consumu de tabacu o trestornos depresivos".

FACTORES CONDICIONANTES

Nesti sen, "los astemios de l'amuesa teníen un estatus socioeconómicu significativamente más baxu que los bebedores moderaos, demostraron menos actividá física, tener menos collacios y ser solteros en mayor proporción", esplica.

Anque, l'autor del estudio alvierte de que "beber más de dos bebíes con alcohol al día ta asociao con un mayor riesgu d'adicción y de potenciales efectos secundarios al interactuar con entemecese con medicines".

En cualesquier casu, apunta Holahan, "les persones que son astemies nun tienen qu'entamar a beber pa intentar meyorar la so salú, porque cuerren riesgu de tener problemes pa controlar el so consumu por nun tar avezaos y podría empeorar el so estáu de salú xeneral más que si nun bebiere"