Publicado 22/12/2020 12:29CET

Cangas reedita'l mapa toponímicu del conceyu y crea mázcares n'asturianu pa la reciella

Presentación del mapa.
CANGAS DEL NARCEA.

UVIÉU, 22 Dic. (EUROPA PRESS) -

El Serviciu de Normalización L.lingüistica de Cangas reeditó'l mapa toponímicu del conceyu. Amás, otra de les campañes diseñaes dende esti serviciu, ye la creación de mázcares n'asturianu destinaes a neños d'ente 6 y 12 años de los centros educativos de la zona rural del conceyu.

El mapa ye un recursu qu'asitia al conceyu de Cangas dientro de la rexón, poniendo nel mapa los pueblos del conceyu cangués cola so denominación n'asturianu cola toponimia oficializada en 2008.

En total editáronse mil exemplares, que se repartieron pelos distintos centros educativos del conceyu, y que van poder solicitase a demanda d'asociaciones del conceyu como particulares que tengan interés en llograr esta cartografía.

Per otru llau, les mázcares van distribuise nes actividaes de la programación Cultural de Navidá y van poder recoyese a demanda na mesma oficina del Serviciu de Normalización L.lingüistica hasta escosar existencies, un total de mil mázcares.

Ente los mensaxes impresos nes mázcares ta'l 'Nunca Chovíu que nun estenera', amás de la variante 'Nunca chovéu que nun estenera', atendiendo asina a les distintes variantes del asturianu occidental. Otra de les mázcares recueye unos versos de la poeta Teresa Lorences, 'You aguanto en pía todu l'hibiernu, porque'l miou amor yá cumo'l ciernu, corazón de carbayu'. Unes mázcares homologaes, fabricaes n'España y diseñaes pola empresa asturiana Trabe, reciclables, llavables, antibacterianas, hidrófugues y transpirables.

Asturianu ofrecido por