Actualizado 04/05/2018 10:02 CET

El cantar 'Los fayeos de mayo', de Felpeyu, ye'l meyor de la música asturiana, según un ranking de RPA

Imaxe de 'Felpeyu' nel 2003.
FELPEYU,

UVIÉU, 4 May. (EUROPA PRESS) -

El tema del grupu Felpeyu 'Los fayeos de mayo' ye'l meyor de la historia de la música asturiana, según la encuesta fecha pola Radio del Principáu d'Asturies (RPA) ente una trentena de personalidaes del mundu de la cultura asturiana.

La emisora pública emitió a lo llargo d'esta Selmana l'espaciu 'Top 25 n'ast', onde se dieron a conocer los 25 temes más votaos por xuráu de más de 30 personalidaes del mundu de la cultura asturiana --académicos, filólogos, músicos, escritores, actores, promotores, xestores culturales y profesores universitarios--. D'una primer esbilla salieron 200 cantares de la que les 25 que se sintieron en RPA foron los más votaos.

Encabeza'l ranking el cantar 'Los fayeos de mayo', de Felpeyu, que foi'l más votáu. Esti cantar publicóse nel 2003 dientro de 'Yá', tercer discu d'esti grupu referencial dientro de la música asturiana. El recordáu Igor Medio ye l'autor d'una lletra que fala de la tardanza na llegada de la primavera y ye tamién l'encargáu de pone-y voz al tema.

La base de la música resulta de la xuntanza de dos melodíes, la primera fecha pol grupu sobre La Xeringosa, un cantar tradicional que funciona como base pa la parte instrumental, y una dancia curtia de Cenera (Mieres) recoyida nel cancioneru de Torner.

Vienen depués del tema de Felpeyu 'Aida de la Fuente', de Nuberu; 'La casa gris', de Llan de Cubel; 'Chalaneru', na versión de Tejedor cantada por Chus Pedro; y 'La Danza', de Dixebra, que formen el top 5 de la música asturiana.

Darréu tán otros temes de Llan de Cubel y Dixebra, 'Rigu Esva' y 'Mañana fría', respectivamente; siguen 'La capitana', de Carlos Rubiera; 'La nada y tu', d'Alfredo González; 'Nun yes tu', de Los Berrones, y 'Na to cintura', de Toli Morilla.

Nel puestu 11 ta'l primer tema en gallego-asturianu, 'Campos de meíz', de Bacotexo. La llingua del estremu occidental d'Asturies, falada ente los ríos Navia y Eo, tamién ta representada na llista nel puestu 14 con 'Volviche', de la Banda de Gaitas El Trasno'; nel 17, con 'Penouta', d'Igor Medio y Lisardo Prieto; y nel 21, con 'A fronteira', de Toli Morilla.

Per otru llau, volviendo al puestu 13, ta Xulio Ramos con 'Anuechi nun suañu'; nel 15 N'arba con 'El cura ta malu'; nel 16 Balandrán con 'Onde la mar'; nel 18 La Bandina con 'La caleya'; y nel 19 Mariluz Cristóbal Caunedo con 'Al pasar por el puertu'.

Nos últimos cinco puestos d'esti 'Top 25 n'ast', amás del tema en gallego-asturianu de Toli Morilla, tán 'Verdiciu' de Rodrigo Cuevas, 'Son de la lluna', d'Anabel Santiago; 'Qué tien esta sidrina', de Vicente Díaz'; 'Dime xilguerín parleru', d'El Presi; y 'Romance de La Pola', de Lucas 15, interpretáu por Nacho Vegas y que zarra la llista colo meyor de la música asturiana.

El programa 'Top 25 n'ast' tuvo presentáu por Xune Elipe y ta incluíu dientro de la programación especial de la radiotelevisión autonómica pa celebrar Selmana de les Lletres Asturianes, que nel casu de la emisora pública va tar centrada na música.

L'espaciu va volver emitise integramente esti sábadu a les 20.30 en RPA, onde se van poder volver sentir los que foron consideraos por un grupu de 30 espertos como los meyores de la historia de la música fecha n'asturianu.

Asturianu ofrecido por

Lo más leído

  1. 1

    El Congreso aprueba la propuesta de Podemos para eliminar mensajes de odio en redes sociales

  2. 2

    Podemos pide al Gobierno medidas para vigilar las redes sociales y eliminar de inmediato mensajes de odio

  3. 3

    Entra en vigor el estado de alarma tras su publicación en el BOE

  4. 4

    ¿En que consiste el nuevo estado de alarma? Estas son las principales medidas

  5. 5

    El Gobierno Vasco establece el cierre perimetral de Euskadi y limita la movilidad de personas al municipio