Casa Palma y José Manuel Tejedor van actuar esti fin de selmana na Seronda d'Avilés

TEJEDOR - Archivo

UVIÉU 24 Oct. (EUROPA PRESS) -

La plaza de Les Aceñes va acoyer esti fin de selmana la XX edición de la Seronda n'Avilés, onde los conciertos de Casa Palma y José Manuel Tejedor Trío van zarrar el programa de les nueches de vienres y sábadu.

Organizada pola Federación d'Asociaciones Xuntanza d'Avilés, el Conceyu d'Avilés y la collaboración de La Plaza y Caxa Rural d'Asturies, la Seronda va tener una carpa que va presidir l'espaciu, que tamién va cuntar con chigre de l'Asociación Cultural de Piniella.

Tamién va haber un escenariu, nel que la música va convertise nel otru protagonista grande del programa d'actividaes, yá dende la inauguración oficial, el vienres a les 19.15 hores cola actuación de la Bandina Cuatrolán.

El mesmu vienres van garrar el relevu los bailles y soníos más tradicionales gracies al trabayu de Xaréu d'ochobre y Escontra'l raigañu, pa depués volver a sentir la Bandina Cuatrolán y terminar col duu Casa Palma y la so personal recuperación y reinterpretación del folclore cántabru en fusión cola electrónica, a les 22.00 hores.

Al otru día, el sábadu 28, principia too al mediudía, n'abriendo la carpa y el chigre a les 12.00 hores la música de la Bandina Xarangana, pa siguir colos cantares de chigre del Orfeón de Castrillón, como aperitivu pa la xinta popular con pote de berces y arroz con lleche, a les 14.00 hores.

Pela tarde, guardóse un espaciu pa la infancia que se va poder embarcar nuna 'Misión Samáin' mui especial, a les 17.15 hores. Depués, la Banda de Música d'Avilés va tocar col grupu de pandereteres Compañeras, enantes de que la gaita de Rubén Alba y la guitarra de Nel de Purnea dominen l'espaciu.

Pa poner el ramu, y xugando en casa, va llegar gaiteru avilesín Jose Manuel Tejedor, col so Jose Manuel Tejedor Trío, a les 21.30 hores.