La caza del llobu va quedar prohibida en toa España

MADRID, 4 Feb. (EUROPA PRESS) -

La Comisión Estatal de Patrimoniu Natural del Ministeriu de Transición Ecolóxica y Retu Demográficu aprobó esti xueves 4 de febreru la inclusión de toles poblaciones de llobu existentes n'España nel llistáu d'especies en réxime d'especial protección, polo qu'automáticamente dexa de ser considerada especie cinexética. Asina lo señalaron a Europa Press fontes d'esti organismu qu'axunta al Ministeriu coles comunidaes autónomes.

La propuesta presentóla la Comisión y precisó d'una doble votación porque na primera quedó n'empate. P'acabar, una mayoría simple, necesaria p'adoptar la decisión, dio-y el vistu bonu, colo que se homoxeneiza l'estatus de les poblaciones de llobu en tol territoriu nacional. Hasta agora, yá taben incluyíes nel llistáu les poblaciones de llobu al sur del Douru pero siguía siendo especie cinexética al norte del Douru.

Cantabria, Asturies, Castiella y Llión y Galicia, toes elles rexones con poblaciones de llobu al norte del Douru, votaron en contra de la propuesta, postura a la que se xunieron otres comunidaes autónomes gobernaes pol PP, según fontes conocedores de la votación. Con too, la propuesta salió alantre col votu favorable del restu de rexones y va llevase a la ministra Teresa Ribera, que va materializar la decisión al traviés d'una orde ministerial.