CCOO del Nalón esixe l'arreglu de los terrenos afectaos pol soterramientu y l'alquisición de nuevos trenes

   UVIÉU, 6 Jun. (EUROPA PRESS) -

   La Unión Comarcal de CCOO del Nalón amosóse esti vienres bien crítica col actu de la puesta en serviciu, esti domingu 8 de xunu, de la llínea feroviaria Xixón-Llaviana, que va cuntar con presencia d'autoridaes. "Nun tamos pa inauguraciones", señalen dende CCOO n'una nota de prensa.

   Afirmen que se lleven acumulando retrasos a lo llargo de 16 años y que en 1968 tardábase en facer esi percorríu diez minutos menos qu'agora. Por esto, ven necesariu que la llínea sía una realidá "accesible, eficiente y con horarios fayadizos".

   Dende la Unión Comarcal de CCOO Nalón aportunen na necesidá d'una inversión real y l'alquisición de los nuevos trenes que faigan la llínea axilosa y práctica", y qu'atienda "como correspuende" a les necesidaes de la ciudadanía.

   "Queremos destacar la importancia del desdoblamientu de la vía nel tramu que va dende El Berrón hasta Xixón, y que la llínea en Xixón métase hasta Cabueñes con más servicios semidirectos que faigan curiosu'l so usu", señalen.

   Pela otra parte, CCOO diz que resulta "urxente" l'arreglu de los terrenos afectaos pol soterramientu, que dexó un "enorme repulgu" nel conceyu llangreanu, asina como la rehabilitación del Barriu de la Ponte.

   "Esiximos a les autoridaes competentes que prioricen esti proyectu y asignen los recursos necesarios pa la so execución. Nun podemos dexar que la falta d'inversión n'infraestructures frene'l desenvolvimientu económicu y social de la nuesa contorna", aportunen dende'l sindicatu.