La CGT sospecha que Konecta Avilés pue despidir a otru mediu centenar d'emplegos con contratu d'otra y serviciu

UVIÉU, 28 d'Avientu (EUROPA PRESS)

El sindicatu CGT denunció güei la intención de Konecta Avilés de despidir a otros 47 emplegaos que tovía queden con contratu d'obra y serviciu nes instalaciones d'Avilés. En declaraciones a Europa Press Gloria Díaz, de CGT, indicó que "mos dixeron que mos queden menos de dos meses y marchamos o mos treslladen a Sevilla".

El sindicatu convocó una fuelga que, según apuntaron, secundó la mayor parte de los emplegaos, asina como delles concentraciones, ante la sede de la empresa y el Conceyu d'Avilés. Esmolez-y que la intención de la empresa de Telemarketing seya la d'esmantelar la sede asturiana pa treslladar el trabayu a otres rexones españoles y hasta fuera d'España.

El pasáu mes de mayu Konecta despidió a 87 emplegaos y hai unes selmanes a otros 37. El primeru de los casos el xulgáu yá dio la razón a los trabayadores al considerar la so marcha como improcedente. CGT sospecha que la empresa sólo va caltener el puestu de les 75 persones que tienen contratu fixu "pa cumplir cola sovención que-yos dio'l Principáu".

Pela so parte, el Bloque por Asturies considera necesario abrir un alderique y plantegase la devolcuión de toes aquelles sovenciones públiques daes a empreses col oxetivu de xenerar emplegu y que dempués acaben en despidos improcedentes, regulaciones d'emplegu o zarru de fábriques, como los casos d'Alas Aluminium, Duro Felguera, Arcelor Mittal y la empresa Konecta.

Konecta recibió per parte del Institutu de Desarrollu Económicu d'Asturies (Idepa) 429.000 euros pa xenerar emplegu estable, y, según el Bloque por Asturies, hasta güei sólo xeneró contratos temporales y despidos improcedentes.