El Conceyu pola Oficialidá afirma que la so propuesta estatutaria recueye dellos puntos en común acordaos col PP

UVIÉU, 10 de Xunetu (EUROPA PRESS)

El Conceyu Abiertu pola Oficialidá (CAO) afirmó güei que la so propuesta d'artículu cuartu pal Estatutu d'Autonomía d'Asturies, nel que se recoyería la oficialidá de la llingua basóse, ente otres coses, en dos puntos en común que-yos ficiera'l Partíu Popular nos conceyos nos que trataren esi tema.

Asina lo explicó güei el voceru del CAO, Fernando Ornosa, respondiendo asina a les declaraciones del presidente popular asturianu, Ovidio Sánchez, y del so compañeru de grupu parlamentariu, Joaquín Aréstegui, nes que se dexaba claro que'l PP nun diba asumir "de nenguna manera" la propuesta y que nunca tuviere a favor de la oficialidá.

"Queremos recordar a Sánchez y a Aréstegui, que nun se pue xugar cola ciudadanía nin facer ilusiones al electoráu, dando a entender que se va dar un pasu", afirmó Ornosa. "El Conceyu Abiertu, que tuvo munchos alcuentros col PP, llegó a una serie de puntos en común con esti partíu que nós recoyimos", añadió. Segúne esplicó, los mesmos yeren que se falare de cooficialidá y non d'oficialida y que se falare de la llibre elección, non de la obligatoriedá, a la hora d'estudiar o escoyer una llingua". Según la versión del voceru del CAO, el colectivu redautó l'artículu basándose nello, quedando "un modelu d'oficialidá a l'asturiana que nun recueyen otros estatutos d'Autonomía". "Estudiámoslo xurídicamente, y como nun plantegaba problemes, incluyímoslo", acabó.

Recordó tamién qu'enantes de les elecciones autonómiques "Sánchez dixo públicamente que la xente que defendía la oficialidá nun se diba sentir decepcionada na reforma estatutaria col plantegamientu del PP". "Queremos recordar tamién qu'Aréstegui, públicamente, el día 16 d'avientu del añu 2007, fizo unes declaraciones nel semanariu Les Noticies onde testualmente dicía que si se pudiere atopar una fórmula d'oficialidá que se reconociere como un derechu, pero non como una obligación, nun diba a ser un problema", agregó.

Esplicó que tanto l'asuntu de la cooficialidá como la llibre elección inclúyense nel testu, y "amás inclúise un apartáu sobre la llei que diz que va haber un periodu de tiempu pa desarrollar la oficialidá, nun siendo una reforma inmediata".

"El Conceyu Abiertu fizo toos estos pasos, polo que mos paez defraudar a la sociedá y a electoráu facer públiques unes declaraciones, dempués de tener estes conversaciones y dempués nun dar esi pasu cuando se ta recoyendo lo que'l Partíu Popular quería" reprochó Ornosa.

"Paeznos mui importante que les persones y cargos del PP, que se posicionaron favorablemente a la oficilidá, dean la cara por ello y salgan a la opinión pública a defender que'l PP garantice esti derechu civil que tienen los ciudadanos que falen la llingua asturiana, y que dean el pasu pa nun favorecer la desapaición de l'asturianu", finó.