El cortu astur-chinu 'Ad vientu' yá tien tráiler oficial

OVIEDO, 2 Ago. (EUROPA PRESS) -

'Ad-vientu', el cortometraxe rodáu n'asturianu de los directores Roberto F. Canuto (Asturies) y Xu Xiaoxi (China), yá cuenta con tráiler oficial. La productora Almost Red Production yá colgó l'adelantu na web de vídeos youtube.com.

El director asturianu Roberto F. Canuto y el cineasta chinu Xu Xiaoxi, responsables de títulos como 'Sandía Amarga', 'Nin Jing: no robarás' o'l llargumetraxe 'Desire Street' (presentes en delles ediciones del FICXixón, con nominaciones nos premios GAVA y dellos premios internacionales), preparen esti curtiumetraxe, el so primer trabayu n'España y n'asturianu.

Según informó la productora Almost Red Production, compañía china de dambos cineastes, esta entidá y les españoles Arkadin Ediciones, de los asturianos Javi y José González-Fierro Santos (editorial especializada nel audiovisual y qu'entama la so andadura na producción) y Producciones Viesqueswood, de l'actriz y productora Beatriz Meré, son les responsables de la producción, falada n'asturianu dafechu y col títulu provisional de 'Ad-vientu'. Los llugares de rodaxe fueron Carreño (playes y senderos de Perlora y Xibares) y Avilés (Cascu históricu y cementeriu La Carriona, incluyendo una escena mientres el desfile de la nueche de reis).

El filme entamó en China'l procesu de posproducción en xineru d'esti añu y va presentase esti añu en dellos festivales n'Asturies, Nacionales ya Internacionales.

'Ad-vientu' ta protagonizáu por David Soto Giganto, actor perteneciente a la Compañía Nacional de Teatru Clásicu y graduáu pola ESAD (Escuela Superior d'Arte Dramático d'Asturies). Representa'l papel de 'Suso', un mozu en paru y sin perspectives de futuru, qu'encara un conflictu d'identidá y tien qu'enfrentase al so tráxicu pasáu familiar. Nes últimes nueches del iviernu crúzase nel so camín una misteriosa moza que paez tratar de comunica-y daqué que va faer replantegase la so vida. Esti personaxe ta interpretáu pola nuevu promesa Icíar Díaz Álvarez (estudiante de la ESAD).

Nel repartu alcontramos ente otros a Lidia Rodríguez Méndez (actriz con amplia esperiencia teatral n'obres como 'Open Doors' o 'ADN'), Beatriz Meré (tamién na producción, graduada pola ESAD y con trabayos como 'Entre líneas' o 'Proyecto Holden') o David Blanka (con una estensa filmografía y nomáu al premiu GAVA 2015 a meyor actor).

El restu d'integrantes de la producción son na so mayoría asturianos o cuenten con importante esperiencia en producciones n'Asturies. Ente ellos atópense Mariló Casas (ayudante de dirección y script), Javier Iglesias (soníu), Natalia Fernández Canuto (amás de producción, responsable de maquillaxe y peluquería) o José Manuel Monge (Ayudante de producción con amplia esperiencia na dirección cinematográfica).

La música va correr a cargu del compositor italo-americanu Andrea Centazzo, collaborador avezáu de los directores y autor multi-premiáu, que cuenta nel so haber con más de 100 álbumes editaos y xires pelos cinco continentes.

La intención de los sos directores, Roberto F. Canuto y Xu Xiaoxi, ye espandir la so amplia esperiencia internacional a Asturies, cola idea de promocionar esti nuevu proyectu en dellos festivales internacionales y apoyar l'espardimientu de la llingua asturiana. Pa lo último contaron cola collaboración de Laura Prieto Rodríguez, profesora y esperta n'asturianu, que tornó y supervisó tolos diálogos del filme.