Coto acusa al Principáu de copiar la felicitación de Foru para promocionar los productos asturianos

UVIÉU, 19 Dic. (EUROPA PRESS) -

La presidenta de Foru, Cristina Coto, acusó al Gobiernu del Principáu de copiar la felicitación de Foru pa promocionar los productos asturianos. "Dende Foru celebramos la campaña del Gobiernu de Javier Fernández, n'apoyu de los productos asturianos, copiada de la felicitación de Navidá de Foru", señala.

Coto refirióse al "claru plaxu del Gobiernu d'Asturies, que nun nos cafia pues nunca sobra, sinón qu'al contrariu, suel faltar dende'l Gobiernu un apoyu a les clares a los nuestros magníficos productos alimentarios, polo que, anque sía copiando, como faen los malos estudiantes, nun ta de más que se promocionen los frutos del nuestru mar y la nuestra tierra".

"Sobre un mapa d'Asturies, dende Foru incluimos una serie de botelles de sidra axampanao asturiana como imaxe pa la nuestra felicitación navidiega; y el Gobiernu del Principáu, tamién sobre un mapa d'Asturies, incluyó una serie de productos típicos asturianos pa la so promoción dientro de la campaña 'Alimentos del Paraísu', nuna más qu'evidente semeyanza".

"Echamos en falta nestes feches -añadió Cristina Coto- que'l Gobiernu de Javier Fernández nun apostara decididamente pola promoción de la sidra natural y axampanao asturiana. Hai un añu aprobóse na Xunta Xeneral del Principáu d'Asturies (XXPA) una propuesta de Foru pa impulsar un conxuntu d'acciones p'apoyar y promocionar la sidra asturiana sobre les que'l Gobiernu pasó perriba, anque se tratase d'una bébora que xunta tradición, popularidá, consumu saludable y ye una actividá xeneradora d'empléu qu'ufre un valor añadíu a la nuestra rexón".

Por eso, Cristina Coto manifiesta que "la nuestra sidra esixe una apuesta decidida como vienen faciendo nos últimos años otros gobiernos autonómicos".